Exitoso instalacion di Directiva nobo pa Rotary Club di Aruba

ORANJESTAD - Rotary Club di Aruba a instala su Directiva nobo pa e aña Rotario 2016-2017. Como Directiva nobo a wordo instala e siguiente miembronan: Sr. Stanley Looman como Presidente, Sr. Frans Brinkman como Secretario, Sra. Mireille Gildhorn-De Miranda como Tesorero, Sr. Ravee Boolchand como Presidente saliente, Sr. Gerardo Oduber como Director-1 encarga cu Administracion di Club y alaves ta e Presidente entrante, Sra. Carolina Lopez Paz como Director-2 encarga cu PR di Club, Sr. Frederick Nuboer como Director-3 encarga cu Miembresia y alaves ta e Secretario entrante, Sr. Maas van Drie como Director-4 encarga cu Projectonan di Servicio, Sr. Orlando Hoevertsz como Director-5 encarga cu Fundacion Rotaria y Sr. James Fazio como “Sergeant at Arms”. 

Durante e anochi aki Sr. Stanley Looman como Presidente di Rotary Club di Aruba pa e aña 2016-2017 a repasa tur a logronan pa e aña Rotario cu a acaba di pasa y a agredici e Directiva saliente pa nan contribucion grandi na beneficio di comunidad di Aruba. Despues di acto aki, Sr. Stanley Looman a keda instala como e Presidente nobo di Rotary Club di Aruba pa e aña Rotario 2016-2017 y na su turno a instala e Directiva nobo di Rotary Club di Aruba. Manera ta conoci, Rotary Club di Aruba a celebra aña pasa su 75 aña di existencia y pa e motibo aki e Presidente nobo a gradici sinceramente e Presidente saliente Sr. Danilo de Freytas y su Directiva di por a organisa un tremendo celebracion di nos 75 aña di existencia. E Directiva nobo tambe a presenta su vision y su metanan pa cu e aña entrante y tambe a elabora riba e tema nobo di Rotary International pa e aña aki cu ta “Rotary Serving Humanity”. 

Un programa hopi special y bunita a wordo prepara pa e anochi aki y e instalacion di un Directiva nobo pa Rotary Club di Aruba a tuma lugar den mahestuoso Alhambra Ballroom, cu pa e ocasion special aki wordo transforma completamente den un anochi encanta, cu un toke unico y special. Un danki hopi special ta bay na e comision organisador y e excelente staf di Divi Resorts y Alhambra Ballroom cu a prepara esaki. Na e ocasion special aki tawata presente su Excelencia Gobernador di Aruba Sr. Fredis Refunjol y esposa, miembronan di Clubnan di Servicio di Aruba y miembronan di Rotary Club di nos hermana isla Curacao. 

Rotary Club di Aruba durante e aña Rotario 2016-2017 lo sigui traha duro riba actividadnan pa recauda fondo, esta nos Fiesta Rotaria y nos Golf Tournament, di cual tur e sumanan recauda lo bay cien porciente na instancianan y fundacionnan den necesidad den nos comunidad.