SIAD: Ora cu edificio na San Nicolas cumpli cu seguridad, lo reanuda servicio

SAN NICOLAS - Na e momentonan aki e edificio di impuesto na San Nicolas no ta den estado adecua pa por duna servicio. E parti unda ladronnan a kibra drenta, a wordo tapa cu plywood, cual ta masha facil pa kita y bolbe drenta. Porta, bentananan y slotnan ta kibra y e edificio mes no ta den bon estado.  

Te aworaki no a haci e reparacionnan necesario, cual ta haci cu e edificio no ta cumpli cu seguridad tanto pa nos personal  como pa e clientenan. Tampoco e ta sigur pa e ekipo cu Departamento di Impuesto tin cu pone eynan. 

Tin basta critica cu keto bay e oficina ta cera, pero na e momentonan aki Departamento di Impuesto no ta tuma e risico pa expone e personal, e clientenan y e ekiponan den un sitio cu no ta brinda e seguridad necesario.

Mester remarca cu e reparacion no ta na encargo di Departamento di Impuesto sino di e gerencia di e Oficina eynan.  E oficina di gobierno na San Nicolas ta un punto di contacto importante unda tin hopi cliente ta acudi y unda tin transaccionnan di placa ta sosode. Asina cu e edificio ta na ordo y ta cumpli cu seguridad, Departamento di Impuesto lo reanuda su servicionan na San Nicolas.