DESPA ta haci yamada na studiantenan biahando pa Hulanda

ORANJESTAD - Departamento di salud (DESPA) kier pa studiantenan cu biaha pa Hulanda proximamente, vacuna contra meningitis. Esaki debi cu e casonan di meningitis ta aumentando na Hulanda. Segun un comunicado di DESPA Te cu aña pasa varios paisna Europa tabata observa cu e casonan di meningitis tabata sigui aumenta. Pa e motibo aki varios pais Europeo a cuminsa integra e vacuna di meningitis den nan programa di vacunacion. Despues di esaki por a observa cu e casonan a cuminsa baha. 

KICO TA MENINGITIS

Meningitis ta un infeccion di e capa fini rond di e celebro (hersenvlies) cu ta wordo ocasiona door di e bacteria “Meningokokken”, cu ta keda den aire despues cu un persona infecta nister of tosa. Un persona cu Meningitis ta experencia keintura halto, dolor di cabes, sacamento, nek stijf y sensibilidad pa luz y/of zonido. Sin cuido medico urgente y optimal Meningitis ta causa morto hopi rapido. Tin diferente tipo di meningitis y esun cu ta aumenta ta esun cu por preveni via vacuna. "Ta p’esey ta haci un yamada pa e studiantenan bin tuma nan vacuna pa nan preveni cu nan por bira malo ayanan", Els a enfatisa. E vacuna contra Meningokokken ta pa hobennan entre 13-18, cu ta esunnan cu mas ta keda afecta. 

PA KEN E VACUNA TA

Arnelda Els, enfermera na Departamento di Salud Publico, Seccion di Malesanan Contagioso a subraya cu e vacuna aki ta mas tanto pa e hobennan cu ta bay studia afo y cu ta bay pasa un temporada mas largo den exterior. DESPA ta haciendo e yamada aki pasobra den e ultimo lunanan aki tin un aumento den e cantidad di casonan di meningitis na Hulanda. 

SITUACION NA EUROPA Y ARUBA

Siguiendo e desaroyonan aki na Europa di cerca y mirando cu pronto hopi di nos studiantenan lo ta biahando pa Europa pa sigui cu nan estudio, Departamento di Salud Publico ta conseha pa e studiantenan pa tuma precaucion y vacuna contra Meningokokken of Meningitis. Mester tuma e vacuna mas pronto cu ta posibel, aunke ta recomendabel pa tum'e 10 dia prome cu biaha pa haya e inmunidad y e proteccion maximo.

IMPORTANCIA DI VACUNA

Ya caba a publica diferente articulo den corant, pero hopi hende no ta mira e importancia pa tuma un vacuna. Apesar cu a haci un yamada caba no ta hopi e hobennan cu a tuma e vacuna. Nan por tuma e vacuna na Hulanda tambe.

VACUNA CONTRA KEINTURA GEEL

Un otro vacuna cu por haya ta esun di keintura geel. Ora bo ta bay den paisnan den Latino America por haya e vacuna aki pa preveni haya ‘Gele Koorts’. Aworaki ta poniendo enfasis riba e vacuna contra meningitis cu ta prevalente na Hulanda y cu no ta den e vacuna basico cu e muchanan ta haya ora cu nan ta baby te ora cu nan ta den 5de Klas.  E cantidad di vacuna cu DESPA tin ta limita. E vacuna aki ta obtenibel na Departamento di Salud Publico Seccion di Malesanan Contagioso pa Afl. 15,- y ta consisti di 1 dosis so. Orario di oficina na Avicenastraat # 1 ta di 8:00am – 12:00 pm y 2:00 pm – 4:00 pm. Pa mas informacion por bel tambe na 5224222.