Of ta paga trahadonan retira di casino of ta bay corte

ORANJESTAD - Of e operador nobo di ex Aura Casino ta honra peticion di FTA pa paga salario atrasa di e grupo cu no a wordo tuma, of FTA ta hiba e operador corte. Asina e presidente di e sindicato FTA Hubert Dirksz a bisa NoticiaCla.com. Den mesun rosea sinembargo, Dirksz ta dispuesto pa 'hinca awa den biña' aunke no ta dispuesto pa bisa cuanto awa nan kier y por hinca. Hecho ta segun e sindicalista, cu e operador mester 'come across'. Asina simpel e situacion ta. 

TRAHADONAN NO TA LAGA E CASO CAI

Segun Dirksz, e 19 trahadonan cu no tin trabou, tin cu wordo paga e 8 lunanan di salario di december pa awo, y otro beneficio segun CAO cu a keda core. "Nos ta kere cu ta un debe di e trahadonan aki, cu e trahadonan no ta bay laga cay. Bo no por laga un compania keda cu bo placa mientras cu bo ta sin trabou", e lider sindical a bisa. Dirksz ta mustra cu segun FTA, e compania cu tin cu bay paga e 8 lunanan aki di salario atrasa, ta e compania nobo. "Si no paga nan, nos tin cu bay laga hues dicidi e ora" Dirksz a bisa, indicando cu ta hiba e compania corte. 

NEGOSACION SIMAN PASA

Pa loke ta e negociacionnan siman pasa, Dirksz a admiti cu e no tabata presente y cu ta mediado a reuni cu e abogado di e compania nobo, y cu e reunion tabata hopi cortico si. "Compania ta keda para ariba cu ta 25 trahado si e mester. Nos tin comprension pa esey mirando e grandura di e casino cu ta hopi limita" Dirksz a sigui bisa. Di otro banda, e beneficionan ta sigui pa esnan cu ta sigui traha. E diferencia ta cu esnan cu ta keda mester negosha un deal factibel, pasobra nan mester tin un garantia di trabou. "E CAO mester keda valido mescos cu e salario ta keda valido, y tur otro beneficio cu ta bin cu ne" e sindicalista a sigui bisa. Mes momento e sindicalista ta conciente cu manera cu e operador su representante a bisa caba, si e sindicato y mediado keda para riba e punto di pago di e 19 trahadonan, e deal completo por cay afo. "Nos ta conciente, pero e situacion aki no mester wordo mal uza. Nos a declara y informa cu nos ta willing pa negosha, pasobra mas importante pa e casino habri porta". A bisa si cu ta dispuesto pa hinca awa den biña, den sentido cu por baha e 8 lunanan atrasa, aunke ta dificil. Pero no kier bisa cuanto awa kier hinca den e biña. "Nos ta willing pa basha awa y negosha basta nos yega na un resultado positivo", Dirksz a finalisa bisando.