Bikker: Hopi pregunta riba derecho pa compensacion pa retraso di vuelo cortico

ORANJESTAD - Tin hopi pregunta riba derecho pa compensacion pa retraso di vuelonan cortico, segun lider di partido Democracia Real, Andin Bikker. Segun e parlamentario, ta hopi ta e pasaheronan cu ta haya nan ta campa oras na aeropuerto ora tin retraso pa vuelonan di apenas 15 pa 20 minuut pa Corsou. E retraso pa e buelonan cortico ey ya a para bira casi un custumber y no ta excepcion. P'esey, segun Bikker, ta hopi ta e preguntanan cu ta yega na Parlamento di Aruba riba e tema dor di pasaheronan cu a haya nan perhudica pa e retrasonan. Na Europa a base di hurisprudencia y leynan vigente un pasahero tin derecho pa haya compensacion si e buelo tin un retraso di mas cu 3 ora. Un retraso asina ta wordo considera como un anulacion (http://deeplink.rechtspraak.nl/uitspraak?id=ECLI:NL:RBHAA:2010:BL6559).

ESTUDIO A CORTO PLAZO

Tumando nota di e reclamonan y e frequencia di retrasonan den vuelonan cortico Bikker ta haya cu ta bon pa haci un estudio a corto plaso riba e tema y evalua na un manera responsabel con e derecho di pasaheronan pa haya compensacion ora vuelo tin retraso por haya un procedura fasil pa eherce e derecho ora ta necesario. Pasobra e derecho pa compensacion, segun Bikker, ya caba tin base legal generico den e Codigo Civil di Aruba, esta incumplimiento di e contrato y tin tratado di aviasion tambe ta duna cierto base legal, pero tin diferente obstaculonan: por ehempel 1. mester paga "griffierechten" pa entrega un claim, caminda cu e sumanan cu ta claim ta relativamente chikito, 2. e asina yama "bewijslast" , y 3. un caso den Corte por dura hopi largo. Un otro aspecto cu sigur tin pa considera segun Bikker ta cu mester bay den dialogo amplio prome cu tur sector, specialmente e aerolinianan, riba e tema. Di banda di Gobierno y Directie Luchtvaart mester evalua cual ta e motibo cu tin asina tanto retraso den e tipo di vuelonan aki y con por evita esaki. Bikker en todo caso lo bay haci preguntanan na Gobierno riba e tema y lo pidi pa pone e tema riba agenda den encuentronan Inter-Parlamentario.