Dos sitio di acohida di emergencia pa refugiado Venezolano

ORANJESTAD – Gobierno (di Aruba) a indica dos sitio pa acohida di refugiado Venezolano. No ta conoci unda nan ta keda y pa cuanto refugiado. Gobierno Arubano ta haci misterioso tocante senario, plannan di emergencia y tambe cifra di ilegalnan Venezolano. Ademas e instancianan di gobierno ta duna informacion contradictorio. For di 2005 segun e Oficina di Combatimento di Desaster tin un plan di migracion masal y entretanto tin un di tres version di e plan. No ta contesta pregunta tocante detaye pa por determina cuanto refugiado Aruba por tuma. E Oficina di Combatimento di Desaster ta bisa cu nan no sa pasobra nan ta trata solamente cu e plan y e ehecucion ta den man di diferente instancia di gobierno. “Pasobra Venezuela ta ‘hot’ actualmente ta kere cu tur cos a cambia, pero no ta asina. No, nos no por bisa ken ta regla e acohida, sino e plan no ta secreto mas.”

Scenarionan nobo

Despues di a mira e plan secreto, a bin sali cu a scohe 25 sitio di emergencia pa calamidad. No ta menciona e acohida pa refugiado Venezolano specificamente.

Entretanto a traha scenario nobo y a resulta cu polis ta hunga un papel grandi den e prome acohida. Fuentenan den polis ta splica pakico: “Si nan yega den un estilo manera di Siria, nos sa esaki sigur mey ora delanta. Y ciudadanonan na tera lo avisa nos como prome ora e botonan bini.” Despues e refugiadonan ta bay dos sitio di acohida designa.

Unda esakinan ta keda y con grandi nan ta no ta cla. Ta minister di Hustisia so por duna e informacion aki, pero e ta inalcansabel. 

Contradictorio

Banda di secrecia tin informacion contradictorio tambe. Asina e Ofisina di Combatimento di Desaster ta bisa cu no tin un taskforce special, mientras cu despues ta sali cu e ta existi masha bon. E tin diferente instancia di gobierno aden, manera Servicio di Seguridad pa monitor e riesgonan.

Tambe e Ofisina di Combatimento di Desaster ta bisa cu gobierno ta coopera cu NGOnan manera Crus Cora. Pero for di 2013 a sali den evaluacion di e plan di calamidad cu esaki no ta regla den practica. Segun e director di Crus Còrá Aruba, Michel La Haye, esaki ainda t’asina. “Nos no tin un acuerdo cu gobierno, kiermen den e ramo ey tin espacio pa mehoracion.

Crus Cora tin espacio di acohida pa 150 hende caminda 100 di nan mester keda den tent. “Esaki ta e capasidad maximo cu nos por ofrece. E ora ey mester haci palabracion si pa nos por participa na e planeamento y e ehercicionan, pa nos por sincronisa bon pa e cos no bira un panico.

‘No prepara’

E becindario di Baby Beach na San Nicolas ya pa añanan largo ta conosi pa e playanan caminda e ilegalnan ta yega cu boto. Gerente Helen di e restaurant cant'i lama Big Mama Grill ta bisa cu e ta mira mas Venezolano drenta. “E refugiadonan ta drenta tur dia.” Erely Elisabeth cu tambe ta traha na e playa ta bisa: “Nan no ta bini asina masalmente den boto grandi, pero nan ta bini si.” Niun di dos no ta kere cu Aruba ta prepara pa un fluho di refugiado. Helen: “No tin luga, apenas tin luga pa nos mes. Aruba semper ta purba yuda. Ma bo no por saca dies man.”

Autor: Sharina Henriquez   for di Ret Karibense    foto: Sharina Henriquez