ATA a sigui funciona despues di retiro di miembronan di AHATA

ORANJESTAD - Casi un luna despues cu tres miembro di AHATA a sali 'en bloc' for di e directiva di Aruba Tourism Authority S.G. (ATA), e situacion den ATA a keda mescos. NoticiaCla.com a haya confirmacion cu ainda AHATA no a presenta su lista di nomber pa reemplasa esnan cu a retira. Pa loke ta e funcionamento di e directiva, esaki no a cambia. "ATA ta sigui draai confirme ley y cargando nan responsabilidad. No manera otronan cu a opta pa chantagia" e mandatario responsabel pa turismo, Otmar Oduber a sigura NoticiaCla.com diahuebs. Mas e mandatario no por a bisa riba e tema. Y ningun otro persona no tabata dispuesto pa papia riba e tema aworaki. Di parti di AHATA, e situacion tambe ta status quo y niun hende no ta papiando eynan riba e situacion. E unico señal di bida cu AHATA ta dunando ta pa medio di su avisonan riba e asunto di all inclusive. 

E KIEBRO

Tabata 3 siman pasa cu representantenan di AHATA den e board di Aruba Tourism Authority (ATA) a retira nan sosten 'en bloc'. Pa medio di un carta cu NoticiaCla.com a tuma nota di dje, e tres miembronan cu ta representa AHATA den e board, Joe Najjar (La Cabana), Jim Hepple (AHATA) y Javier Wolter (CMB) a informa ATA pa medio di e carta, cu nan no ta forma parti mas di e directiva. Motibonan no tabata specifico, pero tin un cantidad di asunto cu a conduci na e desicion 'abrupto' aki.

REACCION DI ATA

Un dia despues, Aruba Tourism Authority (ATA) durante un conferencia di prensa, a lamenta supuesto alegacionan no corecto den direccion di ATA cu a surgi den media despues cu tres miembro di AHATA a entrega nan retiro diaranson di e hunta di supervision di ATA. Esey ta un di e puntonan principal cu e hefe di oficina di turismo Ronella Tjin-Asjoe a presenta diahuebs atardi reaccionando riba e retiro abrupto di 3 miembro di AHATA for di e hunta di supervision di ATA. 

REACCION MINISTER

Reaccion inicial di e mandatario di turismo tabata cu no tabatin ningun motibo duna den e carta di retiro di e miembronan di AHATA for di e directiva di ATA. "Mi no sa kico ta e rason cu nan a pidi nan retiro" Oduber a bisa. E ta haya e comentarionan si duna hopi straño, pasobra recientemente ainda AHATA a elogia e maneho di ATA durante algun evento turistico na Aruba. 

MOTIBO DI RETIRO DI AHATA

Esaki mesun anochi sinembargo a bira conoci e anochi ey mes. Segun fuentenan cerca di e situacion dentro di AHATA, a confirma cu e zet di e gremio hotelero, pa retira 'en bloc' for di e hunta di supervision di ATA no tabata un acto isola, ni un acto di cada miembro individual. A compronde cu e loke a sosode diaranson tabata un acto delibera pa mustra ATA e malcontento cu AHATA tin pa cu e maneho ultimo tempo den ATA. Y den e caso aki, enberdad e asunto di All Inclusive lo tabata e ultimo gota.