ABC a entama caso pa para construccion 'Azure Condominiums'

ORANJESTAD - Aruba Birdlife Conservation (ABC) a entama un caso pa para construccion di e proyecto di condominium Azurre, un proyecto di e desaroyadonan 'PGM Condobuilders'. E ta e tereno bisiña di e proyecto conoci como Blue Residence di condominium tambe y cu ta den construccion actualmente. ABC su intencion ta e.o. pa para esaki inmediatamente. Asina abogado di ABC, esta Geert Rep a confirma na NoticiaCla.com. E caso ta tuma lugar 23 di augustus proximo. 

PGM A NENGA PETICION 

Despues di tabata exitoso den para gobierno pa duna tereno erfpacht pa proyecto hotelero riba areanan marca como tereno 'berde', ABC ta sigui cu otronan cu tambe ta violando e asina yama ROP (Ruimtelijk Ontwikkelings Plan). E tereno cu awor ABC kier para e construccion ta e percela cu a wordo otorga aña pasa door di gobierno. Esaki ta debi cu e compania PGM no a reacciona riba e peticion di ABC di varios luna atras pa para e construccion. E peticion tabata pa para e construccion y debolbe e tereno den su estado original segun su status 'berde'. Y e caso sumario ta un otro intento mas fuerte pa ripiti e 'peticion' aki. 

META DI E CASO SUMARIO

Segun Rep, despues di 12 april, a manda dos peticion mas na PGM. "PGM a contesta: No, nos no ta haci'e pasobra nos interes ta mucho grandi y nos lo sigui construi' ". Y basa riba e casonan recien cu ABC tabata participe  (y unda cu abogado di PGM tambe tabata presente den corte) unda hues a prohibi gobierno di otorga tereno erfpacht den e area ey, y cu gobierno mes a admiti cu e acuerdonan duna, tabata invalido (segun interpretacion di Rep), e kier pa hues duna contenido na e veredictonan ey aki tambe. Esey ta nifica cu conforme e peticion di e caso sumario, ABC kier pa para e trabou di construccion, y pa e grua grandi bandona e sitio, y finalmente pa forsa e partido (PGM) pa deshaci di tur loke nan a construi caba. 

TRATA CASO MANERA ESNAN ANTERIOR

E abogado ta sigura cu e peticion ta cay den margen di e otro casonan cu a bin dilanti anteriormente, y e accionan cu a wordo tuma den nan. "E caso aki lo mester wordo trata manera esunan anterior, y ABC lo trata esaki por lo menos di e mesun forma. E diferencia ta cu den e otro casonan no a otorga e terenonan erfpacht ainda. Pero awor cu gobierno a bisa tambe cu nan ta sinti cu nan lo no bay asisti mas cu dunamento di tereno y cu ta papia di situacion ilegal, nos ta bisa cu e construccion aki tambe mester wordo para. Por lo menos te ora cu e ROP wordo adapta" Rep a bisa. Mientrastanto, e abogado ta haya, cu no por djies sigui construi. E pensamento cu hues por bisa cu e paro di construccion lo ta solamente temporal mirando cu gobierno a confirma caba cu lo bay cambia e ROP, pues ta cuestion di tempo y como tal e caso aki no tin sentido mirando cu tin construccion caba, Rep ta pensa otro. "Bo mester bira esaki. Ta netamente e compania di construccion ta mucho ambicioso, pasobra gobierno a bisa hopi cla cu nan ta den proceso di adaptacion di e ROP, y a bisa tambe cu nan no sa con e adaptacion lo finalisa. Pues mientrastanto no por construi nada. Ademas gobierno a admiti den corte cu nan tabata fout di otorga tereno asabiendas cu tin un ROP cu no ta adapta ainda. "Bo no por adelanta riba algo cu oficialmente no ta permiti". Rep a bisa. E hecho cu nan tin un permiso, no ta valida cu nan por haci of no loke nan kier.