Lejuez: Ta sospecha cliente Chines di homicidio y maltrato cu arma

ORANJESTAD - E muher Chines cu a keda deteni dialuna na e sitio unda cu a haya e director di Serlimar morto, ta wordo sospecha di dos cargo, homicidio y maltrato cu un arma cu consecuencia di morto. Asina su abogado Chris Lejuez a confirma na NoticiaCla.com diahuebs atardi laat. Su cliente a pasa den su prome dia di interogacion henter dia y a termina te atardi pa anochi. "E interogacion ta bayendo poco poco" Lejuez a sigui bisa. Mientrastanto diabierna su cliente tin cu aparece dilanti fiscal y un hues comisario como parti di e proceso di su detencion. 

CARGONAN 

Segun Lejuez, su cliente no ta wordo sospecha di asesinato, pasobra esey ta un cargo di premeditacion, y esey no ta e caso. Por lo menos investigacion tin cu determina esaki. Manera indica, e cliente no a wordo acusa formalmente pero ta wordo sospecha si di dos cargo, esta homicidio (doodslag) y maltrato cu un arma cu un resultado di morto (mishandeling met een wapen met dood als gevolg). A confronta e abogado cu varios pregunta relaciona cu e suseso mes, mas bien detayes di e caso, pero e abogado a nenga di bay riba esaki. Hopi mas e abogado no por a bisa, mirando cu esaki ta apenas e prome dia di interogacion. Ta ora cu e interogacion termina, por cuminsa determina mas cos riba e caso. Prome cu esey, elo no bisa nada mas riba e contenido. 

INTEROGACION DIFICULTOSO

Pa loke ta e interogacion, esaki a bay poco poco y cu dificultad. E abogado no por a bisa si e problema cu idioma tabata un motibo. A interoga su cliente henter mainta y esaki a dura te merdia. Despues a tuma un break y banda di 3'or esaki a continua te ora cu anochi a cera. E interogacion ta continua diabierna atrobe. Mainta prome e tin cu presenta dilanti hues comisario y fiscal, y despues ta sigui cu interogacion.