Heerenveen: Solucionando retrasonan na InselAir

WILLEMSTAD - "E ta berdad cu nos tin hopi retraso". Asina e co-fundador, vice-presidente international y encarga cu asuntonan general pa InselAir International BV na Corsou Edward Heerenveen a bisa NoticiaCla.com diahuebs, reaccionando riba e ola di critica cu tin ultimo tempo riba e aeroliña cu base na Corsou. E cantidad di retraso a pone cu hendenan a cuminsa ventila esaki tur caminda y e ta afectando e compania su reputacion. Mientras cu e co fundador ta admiti y no ta sconde e problema di retraso, e retrasonan tin su motibo. Y e motibo di e retrasonan aki tabata varios segun Heerenveen. Nan ta varia di avionan cu enberdad tabatin problema mecanico, te na e scarsedad di piloto pa via di reglanan stipula pa autoridad di aviacion di Corsou. Mes momento si, Heerenveen a sigura e portal aki cu e retrasonan ultimo dianan aki ta basta domina. "E ultimo dianan aki bo ta mira cu e retrasonan aki a baha bastante". 

PROBLEMA TECNICO Y TENE PASAHERONAN INFORMA

Segun Heerenveen, e retrasonan a wordo ocasiona pa diferente factor. "Claro ora cu un avion daña e momento cu e mester a bay, e ora ey bo ta hayabo cu e hecho cu bo tin cu drech'e prome cu e bay. Esey ta logisch" Heerenveen a bisa. Hopi biaha na momento cu un avion daña, bo no por bisa e pasaheronan cuantor bo ta bay sali (cu e avion) pasobra bo tin cu wak prome kico e problema ta prome cu por sali. "Anto tin bes ta sali afo cu ta tuma mas tanto tempo cu bo ta kere (pa drech'e) ". Y aki tin problema ora cu bo bisa e pasaheronan den cuminsamento pa dunabo un ora, cu despues ta resulta 3 ora. "Esey ta pone cu hendenan ta rabia hopi, pasobra hendenan ta bisa e ora cu bo ta gañanan. Bo no ta bisanan e berdad" Heerenveen a sigui bisa. Segun Heerenveen, e unico manera den aviacion cu bo por duna hendenan un ora fiho ta ora cu bo sa finalmente kico e problema ta, y e ora por bisa cuanto esaki lo bay dura. 

AVIONAN TA BULA MUCHO PA E RUTA 

E di dos motibo duna, ta cu e tipo di avionan aki (Fokker 50) no ta esunnan miho pa e rutanan interinsular (buelonan entre Aruba, Corsou y Bonaire). Manera cu Heerenveen ta splica, nan (e avionan) ta hopi caro pa mantencion. Ta avionan cu mester bula distancianan mas largo pa ta bon utilisa. Y aki e ta referi na buelonan di minimal un ora pa un ora y mey entre buelonan. "Un buelo cu ta bula (e distancia )di Corsou bay Jamaica of Sto Domingo, esey e buelonan cu Fokker 50 ta bon p'e. E distancia entre Aruba y Bonaire ta demasiado chikito pa un avion asina aki" e director ta sigui splica. Y bayendo mas den terminologia tecnico, e ta referi na e cantidad di 'cycle' cu un avion ta pasa aden. Y cada cycle cu un avion pasa aden (den terminologia di avion esaki ta nifica cada bes cu e avion lanta buelo y aterisa y cu ta saca y hinca su 'tren di aterisahe' aden), e ta mas cerca di C-check cu ta e inspeccion grandi di mantencion di e avion. Un inspeccion asina ta costoso (entre 750 mil florin pa 1 miyon florin). Cada buelo pa Aruba (buelo di 25 minuut) y bek tin dos cycle. Un cu ta hinca e tren di aterisahe aden y sake afo. Y ora bin Corsou, esaki ta mesun cos. Dus ta bira 4 cycle den un periodo cortico. Sinembargo pa un buelo mas largo, e ta uz'e dos biaha so. Ora di yega y ora di sali. Y den e mesun ora cu a haci esaki (esun di distancia largo), a bula e ruta di Corsou dos pa tres biaha. Como tal e avion cu ta wordo usa entre Aruba y Corsou, ta bay mantencion mas tempran cu esun cu ta bula e ruta di Jamaica (esta un destinacion mas largo). Como tal e ta bira un ruta hopi caro, e destinacion Aruba y Bonaire (for di Corsou). 

SCARSEDAD DI PILOTO 

E motibo final pa tin retraso, segun Heerenveen ta scarsedad di piloto. Mientras cu tin suficiente avion plus avion pa spare, tin un problema cu no tin suficiente piloto. Direccion di Aviacion Civil den su afan (segun Heerenveen ) pa haya nan categoria 1 atrobe (e ta categoria 2 pa basta aña cu ta nifica cu tin restrinccion pa cierto buelonan pa p.e. Merca), a bin cu reglanan cu ta perhudica InselAir. Nan ta di tal manera cu pa bo haya un piloto pa bula cerca nan, nan (e pilotonan) tin cu pasa un test na Corsou, cu nan a pasa p.e na Hulanda caba. Un ley a cambia 6 luna pasa na Corsou, ta obliga e piloto awor pa pasa tur e examenan atrobe na Corsou, cu ta pone cu e pilotonan ta opta pa no bin Corsou y bay otro caminda. E camindanan ey, ta p.e. destinacionan manera Belgica, of Hulanda mes y mas pio ainda, Medio Oriente unda cu ta paga e pilotonan 3 pa 5 biaha mas hopi, y ta simplemente reconoce e diplomanan. "Nan ta paga e pilotonan dje hopi ey cu na Corsou no por tene e pilotonan. Pa ora cu nan haya e pilotonan, e oferta no ta atractivo suficiente y nan ta keda den exterior". Ni na Aruba tambe no tin e problema cu tin na Corsou pa cu pasamento di examen, segun Heerenveen. Como solucion, a cuminsa pone rutanan (destinacionan) destinacionan hunto, cu por pone un hende pensa cu tin retraso. "Pero den e caso ey nan no ta retraso, sino tin cu pone buelonan hunto". Por ehempel enbes di un buelo bay Aruba straight pa Bonaire, e ta pasa Corsou, cu ta haci e buelo tarda mas. "E cosnan aki a pone cu aviacion a bira sumamente dificil pa dirigi den problema den e ultimo temponan". 

INSELAIR SOLUCIONANDO E PROBLEMANAN

Un di e solucionan cu InselAir a cuminsa implementa segun Heerenveen, ta e forma con ta maneha e asunto di combinacion di buelo. "Nos ta bel hende delanta awo pa bisa nan, cu e buelo ta bay sali tal ora. Delanta nan sa esey" Heerenveen a bisa. Otro cos cu ta haci ta baha cantidad di buelo (frecuencia), cu ta pone cu e pilotonan cu tin ainda, por bula tur e buelonan y cu lo no tin e problema di 'burn out'. Tambe ta papiando cu autoridad di aviacion pa purba duna pilotonan di afo (incluyendo Aruba y Hulanda) un tipo di exoneracion pa cu examenan extra cu mester pasa pa por bula. Tambe e  cantidad minimo di ora cu un piloto mester pa bula, a aumenta di 250 pa 500 ora den un solo tiro. Esey ta nifica cu hendenan nobo, tin un problema pasobra nan no tin suficiente ora, Heerenveen a finalisa bisando. Aki tambe kier yega na un areglo. Pero en general, segun Heerenveen ta solucionando e problemanan poco poco.