Polis a cuminsa interoga e dama Chines riba caso di asesinato

ORANJESTAD - Mientras cu e curpa di e victima di asesinato di dialuna anochi, Richard Fingal, a wordo entrega na famia, di parti di polis tambe e investigacion ta continua. "Awe nan a cuminsa verhoor e dama Chines", su abogado Chris Lejuez a confirma na NoticiaCla.com awe mainta. Despues di e interogacion, Lejuez por a bisa mas di e caso. Manera ta conoci, tin hopi atencion riba e caso di e asesinato di dialuna anochi na un massage parlor na Piedra Plat. Hopi informacion den forma oficial no a sali ainda. No obstante esey, cosnan ta birando mas cla. 

DAMA CHINES

E dama Chines cu a wordo haya na e sitio ora cu polis a yega dialuna anochi, a keda deteni sospecha di ta involucra den e caso. Kico exactamente e cargonan ta, ainda no ta oficialmente conoci. Despues di e interogacion, e abogado por a duna mas informacion. Mientrastanto for di Ministerio Publico, NoticiaCla.com a haya confirmacion cu e dama sospechoso ta keda den detencion. "Investigacion lo tin cu mustra si enberdad (e) ta e persona cu nos mester. Tambe investigacion lo tin cu mustra kico tabata e rason, e motibo di su morto", vocero di Ministerio Publico, Ann Angela a confirma na Noticiacla.com. 

CURPA ENTREGA NA FAMIA

Ministerio Publico a confirma tambe cu enberdad e curpa di e victima a wordo duna liber hopi laat mes den atardi diaranson. Esaki pasobra segun Angela, e autopsia a dura largo. Awor cu e curpa di Fingal a wordo entrega na e famia diaranson, e famia por cuminsa cu preparacion pa entiero, pero no ta conoci ki dia e fecha di entiero ta ainda.  

HOPI PREGUNTA

Tin hopi pregunta cu ainda mester contesta y como tal e atencion ta hopi riba autoridad pa bin cu claridad riba e asunto aki. Den curso di dia ta spera pues mas informacion concreto riba e caso lamentabel aki.