Lampe: Ta uza derota di Red Democratico den forma robes

ORANJESTAD - Partido Red Democratico a dicidi di aclarea e asunto di resultado electoral y nan posicion riba matrimonio homosexual. Esaki debi cu segun e partido, "tanto parlamentarionan como pastornan den e ultimo dianan, a uza e resultado di eleccion 2013 di Red Democratico pa rechasa e amienda cu ta pretende corectamente di caba cu e discriminacion existente, unda un Arubiano heterosexual tin mas derecho cu un Arubiano homosexual", e partido ta bisa den un comunicado. Segun lider di e partido, Rudy Lampe, parlamentarionan y pastornan ta uza ekibocadamente e derota electoral di Red Democratico, 'djis pa hustifica cu pa nan mester tin Arubiano di segunda categoria mescos cu den tempo di sclabitud unda catibonan Arubiano no tabata tin derecho di contrae matrimonio civil'.

ELECCION ANTERIOR 

Lampe a bay mas leu cu e ultimo eleccion. "Si awor pastor y parlamentarionan ta bisa cu na 2013 pueblo a rechasa Red Democratico y por lo tanto a rechasa tambe matrimonio homosexual,  esey kiermen cu pueblo a rechasa tambe e lucha anticorupcion cu tabata bandera di Red Democratico na 2009 unda tambe a perde eleccion" e ex pastoor a sigui bisa. " Y esey kiermen cu mester acepta pa bay contra e 10 mandamentonan, ya cu un mandamento importante ta ‘no horta’, y corupcion kiermen horta placa di pueblo, y ta pueblo a dicidi toch". Segun Lampe, ora partido AVP ta bisa di no tabata tin esaki den su programa y p’esey no por vota na fabor, mester bisa acerca cu e tram tampoco tabata den programa di AVP y toch e a keda ehecuta. " Loke si tabata den nan programa ta e scol di MAVO-HAVO na Noord, cu sinembargo nunca a mira luz di dia. Bisa ‘A’ kiermen bisa ‘B’ tambe, sea consecuente". Lesa e comunicado completo aki.