Kooyman y FTA porfin a firma nan CAO

ORANJESTAD - Despues di a negocia simannan largo, Kooyman y FTA a yega na un acuerdo pa cu e CAO nobo di 3 aña. E ultimo punto di discusion tabata e montante di e lumpsum cu lo a paga den un solo biaha. FTA tabata kier pa hisa esaki di AWG 1500,- pa AWG 1625,- pero Kooyman no a bay di acuerdo cu esaki. Kooyman tabata dispuesto si pa paga e lumpsum den un solo biaha na lugar di reparti esaki den 3 aña consecutivo. Dia 7 di juli ultimo e empleadonan por a vota riba esaki y mayoria a vota na fabor di e proposicion. E CAO nobo a wordo firma awe y lo ta retroactivo for di 1 april 2016.

CLIENTENAN STROBA

Segun e compania, e noticia aki ta sumamente positivo pero Kooyman ta lamenta cu su clientenan a haña nan stroba durante e periodo aki. ‘Satisfaccion di nos clientenan ta e cos di mas importante pa nos y en realidad nan a bira e victima di e negociacionnan. Pa e motibo aki nos ta pidi nos mas sincero disculpa pa e inconveniencia cu nos clientenan a experiencia y nos lo haci nos maximo pa ofrece un biaha mas e servicio cu nan ta merece’. Esaki segun Juri Kooyman.