Incumplimento di acuerdo dialogo social riba tarifa coriente pa hotel

ORANJESTAD – Ainda e compania di electricidad Elmar no a honra e acuerdo cu AHATA riba e asunto di reduccion di tarifa di coriente. “E tin cu wordo atendi ainda” CEO di e organisacion hotelero, James Hepple a bisa NoticiaCla.com . Segun Hepple, un di e puntonan acorda pero nunca implementa ta e cambio di cobransa di coriente, pasobra ainda ta cobrando a base di e ‘capacidad instala’ di e hotel. Esey no ta e forma corecto di anda segun Hepple, pasobra e no ta duna e bista corecto. Cobra manera cu ta haci awor, ta basa riba e potencial cu por cobra, y no riba e uso real. Y esey no ta corecto.

Mirando e situacion ey, hotelnan a inverti un gran cantidad di placa den forma pa ta mas eficiente riba uso di coriente. Problema segun Hepple sinembargo ta cu ora cu nan a haci esaki, toch hotelnan no tabata nota un cambio (reduccion) den nan tarifa di coriente. “Ainda nos ta wordo cobra riba e principio di capacidad instala, enbes di e otro puntonan acorda”. Como tal, mirando cu esaki no ta resolvi, AHATA a mustra cu nan lo sigui atende e asunto aki den e proximo reunionnan.

Loke ta mas pio ainda segun Hepple, ta cu durante un dialogo social a bay di acuerdo pa resolve e asunto aki, pero awor ta resulta cu Elmar mes, tin un problema cu e acuerdo aki. “E no ta nos responsabilidad pasobra bou di e reglanan aplica, por cobra solamente segun e capacidad instala. Pues ta e reglanan ey tin cu cambia” Hepple a bisa. E ta algo hopi importante pasobra ta un compromiso cu a wordo sera cu nos, y nos kier pa e wordo respeta. Awor cu tin un minister nobo di finanzas, e la priminti cu mester implementa e reglanan acorda. Y a basa riba esaki, AHATA a firma e protocol di AZV, den un acto di bon boluntad.