Croes: Otro casinonan na Aruba no ta bayendo bon

ORANJESTAD - "Despues di algun incidente den e sector di casino a bira momento pa den un forma integral mira kico ta pasando den e sector di casino na Aruba. E sector ta confronta retonan nobo, y banda di esaki e control riba nan manera di opera mester ta mihor". Asina minister di labor Paul Croes a declara den un comunicado. E declaracion aki a bin despues di e anuncio di un operador nobo di Aura Casino siman pasa. 

CASINONAN DEN MAL SITUACION

Tin indicacionnan cu otro Casinonan lo no ta den nan mihor momento y pa evita un di dos Aura Casino mester sinta cu representantenan di Casinonan. "Nos tin contacto cu e asociacion di casinonan pa asina scucha for di nan kico ta e dilema cu tin den e sector aki. Banda di esaki mi lo papia tambe cu coleganan di husticia y tambe impuesto pa mira si mester mihor control den e forma cu casinonan ta opera. Di mi parti nos lo ta hasiendo inspeccion mas intensivo riba cumplimento di nos leynan laboral manera entre otro pago, contrato y otro aspectonan legal", minister Paul Croes a mustra.  Locual Croes kier purba evita pa surgi un suceso similar na Aura Casino den otro hotel nan.  "Pa awor a logra un solucion parcial pa e situacion di Aura Casino, pero nos kier keda monitor e sector mas di cerca", minister di Labor a bisa. A keda di convoca un reunion cu e representantenan di Casino y tambe di trahadornan pa asina sigui e discusion.