Exclusivo: Operador nobo riba futuro di ex Aura Casino

ORANJESTAD - Mientras cu enberdad gobierno a anuncia cu tin un acuerdo entre e doñonan nobo - di ex Aura Casino - y e hotel (Occidental) pa opera e casino, e acuerdo final ta depende di e negosacion cu lo cuminsa diahuebs awor entre e operador nobo, mediado di gobierno y e sindicato FTA. Den un entrevista exclusivo cu representante di e doño,- cu pa e proposito aki ta haya e nomber 'Jack' -, NoticiaCla.com a haya un bista 'interno' di e situacion actual y kico tur por spera e proximo dia pa simannan nos dilanti.  

ACUERDO FIRMA

Segun Jack, enberdad tin un acuerdo firma entre e partidonan. "Pero tin un clausula cu ta dicta cu si nos no por yega na un acuerdo pa loke ta e empleadonan, nos por 'sali afo' " Jack a bisa. E tempo cu nan por negosha ta 90 dia, den cual esaki mester keda cla. Asina cu e acuerdo keda cla, e trabounan mes ta cuminsa cu ta inclui pone e casino opera atrobe. E negosacion cu falta ta envolvi e empleo di 25 trahadonan cu ta keda, y kico ta para di e resto di esnan cu no a haya trabou. Nan situacion ta instrumental pa e deal por sigui. 

PAKICO REDUCI E PERSONAL

E motibo cu e operador por a tuma solamente 25 persona (di e 44) ta pasobra e espacio pa e casino a wordo reduci den tamaño despues cu a cer'e na december. " E (espacio di e) casino tabata tres biaha e tamaño cu e ta aworaki" Jack a sigui bisa. E motibo di reduccion tambe, ta pasobra e negoshi di casino a cay hopi, y como tal mester a reduci esaki den tamaño. De hecho, Jack ta mustra cu e situacion di casino na Aruba no ta nada bon y cu otro casinonan riba e isla tambe lo tin cu sea reduci nan tamaño, uni cu otro, of cera nan porta completo. 

KICO TA PASA CU ESNAN CU NO HAYA TRABOU

Detaye di kico lo pasa cu e otro trahadonan ta netamente loke negosacionan lo tin cu determina. E negosacionan lo mester cuminsa diahuebs awor, y ta aki ta determina kico ta bira di e casino. Si no por yega na un acuerdo riba e asunto di e grupo cu no por haya trabou, posiblemente e deal lo no por sigui. "Esey ta e punto cardinal" Jack ta sigui bisa. Pero e ta positivo cu tur cos lo sali bon. Mas Jack no kier a bisa. E  fecha di e reapertura di e casino tambe ta depende di e negosacion. "Unabez cu nos a yega na un acuerdo, nos lo cuminsa nos negoshi. Pero lo dura por lo menos 3 luna pa por habri e casino" Jack a bisa NoticiaCla.com. Pero despues a mustra cu, bon boluntad, eventualmente por tene un 'soft opening' mas prome. 

SITUACION DI E EDIFICIO Y CASINO

E edificio (NoticiaCla.com a haya un bista di e interior di e casino y falta basta cos pa wordo haci) mester wordo drecha, mester cambia e situacion di coriente (wayanan), y mester trece machinan nobo pa por keda competitivo. "Nos a test 60% di e machinan y nan ta mustra ok" Jack a sigui bisa. E reto mas grandi ta e logistica. "Unabez cu bo tin un acuerdo, bo tin cu trece e machinnan, cu por dura entre 6 pa 8 siman". 

REBRAND E CASINO

Unabes cu e casino habri cu e operador nobo, e lo tin un nomber nobo tambe. "Su nomber lo no ta Aura" Jack a bisa. Lo 'rebrand' e casino. No tin un nomber ainda pa e casino pero a sigura cu e no ta un frankisia sino uno netamente local. "Nos tin algun nomber cu nos ta evaluando pa scohe for di dje". "For di un aspecto di casino, nos kier purba di haci e negoshi aki mas exitante. Nos kier haya un nomber interesante cu ta atrae e cliente. Cambia e experiencia" Jack a sigui bisa. 

FUTURO DI E CASINO

E operadornan nobo ta estableci na Aruba cu un NV, y tin experiencia amplio den maneha casino. Mas detayes di e nomber no por a wordo duna ainda. "E partnernan ta hopi experencia den e negoshi di wega" ta e unico cu Jack tabata dispuesto pa bisa aworaki. Pero si esaki no funciona, e por ta e ultimo intento. "Esaki ta nos ultimo speransa. E casino tabata drumi pa 6 luna, durante cual tabatin algun grupo cu a mustra interes" Jack a bisa. E no por a bisa si, cuanto tabatin prome cu nan. Loke e sa ta cu mas probable, di loke el a compronde cu esaki ta e ultimo biaha.