Obispado ta splica posicion riba amienda di union civil

WILLEMSTAD - Cualkier proposicion den Parlamento relaciona cu "Geregistreerd Partnerschap”, Iglesia di su parti ta respeta como un derecho humano pero no ta reconoce cualkier tipo di union envolvi den e asunto aki como valido den bista di Dios. Esey ta un di e hopi puntonan cu Obispado di Willemstad a subraya den un comunicado riba e amienda cu e parlamentario Desiree de Sousa a entrega recientemente pa wordo trata. "Obispado di Willemstad a bin tuma nota di e ultimo desaroyonan encuanto un amienda presenta pa votacion na Parlamento di Aruba den cual ta crea e posibilidad pa reconoce casamento entre personanan di e mesun sexo" e comunicado ta sigui bisa. NoticiaCla.com a saca e esencia di e asunto den e articulo aki, pero ta publica tambe e comunicado completo. 

PROPOSICION DI PARLAMENTO 

Segun Obispado, nan ta consiente cu e proposicion den Parlamento no ta trata e idea di matrimonio di mesun sexo, sino di “Geregistreerd Partnerschap”. "Sinembargo den cuadro di esaki Iglesia Catolico ta mira e necesidad pa por yega cerca pueblo pa bolbe siña e berdadnan di Dios" Obispado ta sigui bisa. "Un gobierno cu ta pone e union aki di e mesun sexo riba e mesun nivel igual cu matrimonio ta actua arbitrariamente y ta bay contra su debernan pa bienestar comun". 

REACCION RIBA PASTOR SZPILA 

Riba e predicashi di pastoor Daniel Szpila, tambe Obispado tabata hopi cla. "Ta duel nos cu e asunto aki a lanta hopi discusion, a crea mal sintimento y hasta a causa vandalismo. E mensahe di Pastor Daniel Szpila ta solamente expresion di su tarea sacerdotal y profetico" Obispado a sigui bisa. 

NO TA DISCRIMINA

Di otra banda Iglesia Catolico ta mira e necesidad pa por yega cerca pueblo pa bolbe siña e berdadnan di Dios. "Ta importante pa indica cu Iglesia manera un mama ta stima tur su yiunan sin importa diferencianan personal, cultural, sosial of orientacion sexual. Ta p'esey, ta rechasa tur tipo di descriminacion y exclusion contra cualkier hende of grupo y ta sigui encurasha pueblo cu amor di Dios pa mustra respet y promove balor pa dignidad di cada hende specialmente esnan cu tin un orientacion homosexual den nos comunidad.

MATRIMONIO DI MESUN SEXO

Riba e tema di matrimonio, y esun di mesun sexo tambe Obispado a haci mencion. "Segun Iglesia, matrimonio ta un institucion natural estableci pa Dios, e Creador, un aliansa den cual un homber y un muhe ta forma cu otro un union pa henter nan bida largo cu ta ordena pa dos proposito inseparabel:  e bon di e esposonan y procreacion y educacion di e yiunan. (Kanon 1055)  Ta p'esey, ta solamente entre un hende homber y un hende muhe cu matrimonio por existi. Pasobra e structura natural di sexualidad humano ta haci un homber y un muhe un pareha cu ta completamente otro den transmision di bida humano".  Segun Obispado, ta solamente e union entre homber y muher por expresa e complementaridad sexual cu Dios ta desea pa matrimonio. Pues e union di e mesun sexo ta contradici e naturalesa di matrimonio dor cu fuera cu e ta falta e complementaridad aki, tampoco e no por copera cu Dios pa crea bida nobo; pues no por logra e proposito natural di union sexual. Pa e motibo aki e union di e mesun sexo nunka no por ta igual ni tampoko por cuadra cu Dios su plan riba matrimonio y famia. Lesa e comunicado completo aki.