Xander Bogaerts a luci den su prome wega All Star

SAN DIEGO - Aruba su pelotero profesional Xander Bogaerts a saca cara diamars anochi como e prome Arubiano pa participa den e All Star Game di liga mayor di baseball Mericano. Cu dos turno na bate di cual uno tabata un doblete, su presencia a enlokese Arubianonan mas ainda. Y porta e persona mas emociona, tabata su mama Sandra Brown. "E tabata cada mama su soño pa wak mi yiu haci un bon papel den All Star Game", Brown a bisa NoticiaCla.com diaranson mainta for di San Diego. "Cu nan a gana, tabata un bonus. El a bal cada minuut di e buelo di 8 ora (for di Aruba). Cu a pone e bandera di Hulanda (enbes di esun di Aruba) tras di nomber di Xander, no mester ta un problema segun e mama. No por kita afor cu Corsou su yiu di tera Kenley Jansen (Dodgers) tambe a wak accion y a poncha su bateadornan bunita den di 8 inning, y a saca cara di su isla. 

PRESENTACION DI XANDER

Manera ta conoci, Xander Bogaerts a haya e derecho pa cuminsa den e alineacion di e ekipo di liga Americana. Pregunta tabata con largo lo a lague aden. Y esaki a haya su contesta rapido ora cu despues di dos turno na bate, el a wordo saca afor den di 3 inning. Pero pa tur cu a wak e wega, nan a goza di e loke nan a wak. Bon fildeo y bateo a pone tur hende yena cu orguyo di nos X-man. "Sigur tabata fabuloso wak nomber di mi yiu homber riba e pantaya grandi " Brown a bisa orguyosamente di su yiu. No ta prome biaha cu Brown ta presencia wega di su yiu live, pero esun di ayera porta tabatin un significacion mas grandi. 

BANDERA DI HULANDA ENVES DI ARUBA

Riba rednan social ora cu a presenta e informacion di Bogaerts riba pantaya, cu e bandera di Hulanda enbes di esun di Aruba, esaki a crea un ola di reaccion negativo y un discusion nacional riba e topico aki. Expertonan diplomatico cu NoticiaCla.com a consulta tanto na Hulanda y Aruba diaranson mainta, a mustra cu e splicacion ta simpel. Xander Bogaerts ta un ciudadano cu nacionalidad Hulandes cu ta de facto Reino Hulandes. Y e bandera di Reino Hulandes pa decreto Real ta e bandera di Hulanda. Pues mientras cu emocionalmente e ta un asunto di orguyo, e realidad ta cu internacionalmente e bandera Hulandes ta wordo uza y reconoci como esun di representacion di nos islanan. Y e hecho cu ta naci of no, ta uza e bandera di Hulanda. Mama di Xander Bogaerts, Sandra Brown no tabatin problema cu e asunto. "Nos tur ta ciudadano Hulandes. Nos a nace na Aruba. Nos tin un pasaporte Hulandes cu ta determina nos nacionalidad. Nos tur ta yena e documento di imigracion ora cu nos biaha" e mama a sigui bisa. "Mi no ta perde soño anochi riba e asunto aki, specialmente ora cu den e pasaporte ta para 'valido pa biaha pa tur parti di mundo'. Mi ta stima mi pasaporte Hulandes" Brown a finalisa bisando. Foto cortesia MLB.com