Polis a tuma auto di victima di asesinato den beslag diamars

ORANJESTAD - Polis a tuma e auto di e victima di e asesinato un anochi prome esta Richard Fingal, den beslag diamars den dia. Esaki a keda confirma pa vocero suplente di polis Liliana Rasmijn na NoticiaCla.com diamars atardi. "Si, e tabata e auto di e victima dus a takel e pa verder onderzoek " Rasmijn a finalisa bisando. Mas informacion no tabata disponibel. Pero e caso cu a haya e auto di e victima na un lugar cu no tabata su ultima lugar cu a hay'e, a lanta hopi pregunta. 

E LOCALIDAD DI E AUTO

NoticiaCla.com a compronde cu e auto di e victima, (un Hyandai Tucson) a wordo haya na un restaurant na Solito diamars mainta, mientras cu e victima su curpa un anochi prome tabata na e salon na Piedra Plat. Con e victima a yega eynan, ta wordo investiga tambe. For di ministerio publico no tabatin mas informacion disponibel. 

SHOCK DEN COMUNIDAD

Mientrastanto den comunidad por a sinti y lesa mensahe di condolencia y convivencia, sigur riba rednan social. Entre nan tabata notabel esun di e cara di Serlimar, e compania cu Fingal tabata director di dje, esta Lionel Croes. "No tin palabra pa expresa y pa consola famia y coleganan di Serlimar. Cu inmenso tristesa nos ta confronta e tristo noticia di fayecimento tragico di nos directeur R.Fingal", Croes a pone riba su pagina di Facebook. Ademas Croes a yama Fingal como 'un persona visionario y cu a haci hopi cambio positivo den Serlimar'. " Awe nos ta di luto" Croes ta finalisa su mensahe conmovedor. Asina e pensamento tabata sigur den comunidad pa cu e persona aki. 

E CASO

Manera ta conoci, e  victima di e caso di asesinato dialuna laat den un lugar di massage, a resulta di ta director di Serlimar. Vocero di polis Liliana Rasmijn diamars merdia a confirma  na NoticiaCla.com cu e victima enberdad tabata Richard Fingal (59) ta traha na Serlimar". E dama deteni (sospecha di ta involucra den e caso) ta un dama chines.  Pa loke ta Fingal, prome cu e tabata director di Serlimar, e tabata director tambe na DOW y prome Santa Rosa.