Tur cos ta cla pa All Star Game cu Xander Bogaerts aden!

SAN DIEGO - Tur cos ta cla pa e wega di estrella cu nos astro pelotero profesional Xander Bogaerts formando parti di e ekipo di liga Americano. Bogaerts ta skirbi historia asina como e prome Arubiano cu ta logra esaki, esta forma parti di e wega cu ta marca e mitar di e temporada regular di grandes ligas di baseball Mericano. Dialuna e hungadornan (incluyendo Bogaerts) a ricibi nan uniform di all star pa por luci cu ne awe nochi. E wega ta cuminsa pa 8'or y e ganador ta haya derecho di habri e serie mundial na october proximo. Dialuna e fiesta a cuminsa cu e acostumbrado 'Homerun Derby' cu a wordo gana pa Giancarlo Stanton, cu na su prome salida a logra lidera e anochi cu 24 homerun. Den e siguiente buelta el a dal 17 homerun y finalmente ela dal 20. 

AMBIENTE NA ARUBA

E ambiente na Aruba sigur pa e wega ta hopi halto y tur hende ta den e keintura pa wak e wega. Un di e lugarnan cu ta pasa e wega completamente pornada ta Crystal Theatre unda cu for di 7'or di anochi e portanan lo habri. Lo tin cuminda y cos di bebe tambe.