Situacion di pago na WEB a mehora un poco awe

ORANJESTAD - "Actualmente ta posibel pa clientenan haci nan pago na WEB mes, pero ta pidi pasenshi door cu lo mester procesa pago na man". Asina e mensahe actualisa di e situacion di pago di e compania ta aparece awe riba nan pagina di Facebook. Esaki relaciona cu e fayo tecnico den nan sistema di administracion di cliente. Segun e compania, e servicio pues lo ta mas slow cu normal. "Na WEB lo por yuda solamente clientenan cu bini cu nan cuenta di awa. Pues ta pidi tur cliente cu kier haci nan pago na WEB, pa por fabor bini cu bo cuenta di awa" e compania ta sigui bisa.

PAGO OTRO CAMINDA

Pagonan tambe ta posibel na banconan of online banking. Solamente cu e compania ta insisti cu ainda esaki no ta posibel na ELMAR y oficinanan di gobierno. "Keda pendiente pa mas update. Nos tin e confiansa cu tur cos lo normalisa den curso di awe. Un biaha mas nos disculpa y nos ta aprecia boso cooperacion y comprension" e compania a finalisa bisando. 

E PROBLEMA INICIAL

Un fayo tecnico den sistema di administracion di cliente di WEB a pone cu for di ayera y por lo pronto no por a paga cuenta di awa na oficinanan di gobierno y na ELMAR. Asina e prome mensahe a bin dialuna mainta di parti di e compania di awa. WEB a pidi clientenan pa haci nan pago na oficina di WEB mes, na banco of online. E compania di awa y energia a splica dialuna cu nan a habri siman cu un fayo den nan sistema automatisa. Na prome instante tawata mustra cu e sistema lo no ta accesibel ningun caminda. Consecuentemente no por a yuda clientenan cu for di trempan a bin paga nan cuenta di awa. E teamnan di Customer Service y maneho di informacion mesora a bini hunto pa evalua e situacion y den poco tempo a logra lanta e sistema, di manera cu lo por atende clientenan atrobe. " Entretanto ta traha duro pa reestablece e contacto entre e sistema di administracion di WEB y e sistemanan di ELMAR y Hulpbestuurskantoornan" e compania a bisa despues. Lo mantene clientenan informa di progreso di e trabounan via WEB su pagina di Facebook.  Relaciona cu e inconveniencia, gerencia a dicidi di no cobra e boet di 10 florin, cual normalmente ta cobra ora un cliente paga despues di e ultimo fecha pa paga.