E locura di momento ta e wega Pokémon Go

NEW YORK - E ultimo fenomeno cu ta garando mundo y posiblemente tambe Aruba, ta e wega conoci como Pokémon Go. Su efecto ta asina grandi cu den apenas algun dia e compania a gana algun biyon dollar na entrada. E wega di Nintendo, su implicacion ta asina grandi y den e formato cu e ta opera, el a bira e wega mas popular y 'downloaded'. Y lamentablemente, hunto cu ne, noticianan negativo a cuminsa circula caba. Tur ta haci'e un formula perfecto pa hala atencion mundialmente. Hasta na Aruba. 

E CASO

Tabata den añanan 90 cu e frankisia di Nintento a bira popular, y awor ta haci un re-aparicion pero mucho mas grandi y conoci e biaha aki como Pokémon Go. E popularidad di e version aki, ta cu e ta live y ta pone bo bira activo y cana y busca e pokémon pa catch e. Pokémon Go ta uza e GPS y holoshi di bo telefon y ta detecta unda bo ta fisicamente y den e wega y ta laga e pokémon aparece rond dibo, riba bo pantaya. Segun bo ta cana rond en busca di e pokémon, mas ta aparece riba bo pantaya, dependiendo unda bo ta y ki ora di dia. E idea ta pa encurashabo pa biaha rond den mundo real y gara e pokémon nan. E combinacion di un wega combina cu mundo real ta wordo yama realidad aumenta. 

POPULARIDAD

Loke ta haci'e popular ta cu e ta pornada y facil pa download. Ademas pa amantenan di Pokémon di pasado, e ta realisa un fantasia di nan cu nan tabatin for di ora cu e prome wega a sali. 

PELIGRO

Peligro ta cu den e wega bo por incorpora cierto aspecto pa otro hende haya bo. Y cu esaki,  ladronannan ta pretende di ta hunga e wega cu bo, y ora cu nan haya bo, nan ta sea hortabo, violabo of den caso extremo, hasta mata bo. Varios persona a haya nan morto caba cu e wega aki. Como tal e compania conciente di e problema, ta sugeri cu ora cu bo bay 'trip' pa haya e pokémon, bo no bay bo so, sino cu un hende. 

NA ARUBA

E wega ta disponibel y ta funciona na Aruba tambe, aunke cu su popularidad ainda no ta asina grandi. E fenomeno peligroso si a hala atencion mesora y na Aruba hende ta mas bien haci bofon di e locura cu esaki a crea. Esey no ta kita afo cu e wega ta uno popular y cu na Aruba tambe e ta funciona. E wega ta obtenibel tanto pa android como iphone.