Autonan di Merca ta jega Aruba otro siman pa One Cool Summer Nationals

ORANJESTAD - One Cool Summer aña aki un biaha mas lo bai tin participantenan International, otro siman e container lo ta jegando Aruba riba e barco di King Ocean cu 6 auto cu ta bin pa competi contra di nos orguyonan local. Sigur danki na Frans Ponson kende a pone su wagon disponibel pa asina e 6 autonan aki por a load na Port Everglades siman pasa y ya ta riba waf cla pa sali pa bin Aruba. Den e autonan biniendo tin e auto "El Brujo" cu ta un Mitsubishi cu recientemente a bira campeon na Merca y tin un mihor tempo di 7:40 sec, e Toyota Starlet "La Dianira" cu tin un miho tempo di 7:90 sec, un RX 7 "Cristians" cu ta core 7:40 sec, un RX 8 "Miñana" cu tin un mihor tempo di 7:50, un Toyota Corolla di Miñana cu ta core 9:20 sec y por ultimo e RX 8 di Pimar cu ta core 7:50 sec. Tur e drivernan y nan crew lo wordo treci Aruba cu Insel Air Aruba y e autonan lo lo wordo saca e siman despues pa asina nan por wordo poni nan na differente lugarnan strategico pa asina e publico por jega cerca y saca potret cu e autonan. Diaranson 27 di Augustus lo bai tin e anochi di inscripcion combina cu un car & bikeshow na e mall di mas grandi na Aruba esta Palm Beach Plaza Mall na unda tur e autonan di Aruba cu ta participando den One Cool Summer tambe ta keda coordialmente invita pa bin show nan vehiculo y nan sponsernan pa e publico como tambe nos bishitantenan cuminsando for di 7or di anochi te cu 10or di anochi. Pa esnan cu ta buscando nan package di entrada esaki ya ta obtenibel na Fun Miles su oficina principal na Dakota Shopping Paradise pa solamente 75 florin of bo por swipe bo caarchi Fun Miles tambe sea e suma completo pa 3750 FM of 800 FM mas 59 florin. E caredanan mes lo tuma lugar dianan 29, 30 y 31 di Augustus riba pista di Palo Marga International Raceway Park y ta conta cu un programa sumamente atractivo pa e publico cu lo jega pista pa disfruta di e caredanan.