Victima di asesinato tabata director di Serlimar Richard Fingal

PIEDRA PLAT - E victima di e caso di asesinato dialuna laat den un lugar di massage, a resulta di ta director di Serlimar, Richard Fingal (59). Vocero di polis Liliana Rasmijn diamars mainta a confirma solamente na NoticiaCla.com cu e victima tabata trata di "R.F. naci na Aruba y probablemente e ta traha na Serlimar". E dama deteni (sospecha di ta involucra den e caso) ta un dama chines. Mas informacion no por a saca afo. Pa loke ta Fingal, prome cu e tabata director di Serlimar, e tabata director tambe na DOW y prome Santa Rosa. 

E CASO

Manera cu NoticiaCla.com a raporta inicialmente, tabatin un caso di asesinato cu a tuma lugar dialuna anochi. Oficialmente e informacion ta cu e yamada di emergencia a drenta 9: 21 pm na Centrale Post, raportando un atraco na Beauty Health Museum. Na yegada di patruya, polis a bin haya un homber sin bida. Polis a pasa pa detene un señora na e sitio pa interogacion. Aunke no confirma (ainda), ta mustra cu e dama aki lo ta esun cu a hinca e homber mata, durante un session di massage. Polis tecnico ta haciendo su investigacion mientrastanto, y ainda no a logra identifica e persona sin bida. Recherche a tuma e curpa den beslag y tin e caso bou di investigacion. Asina cu tin mas investigacion, lo informa riba esaki. NoticiaCla.com ta manda palabra di condolencia na famia di e fayecido.