Reapertura di refineria por tin retraso chikito

ORANJESTAD -  Riba e fecha di 1 augustus  e refineria ta cuminsa opera como CITGO, aunke den forma preparatorio. Por lo menos esey ta e palabracion. Pero for di informacion cu NoticiaCla.com tin, ta mustra cu e por tarda un poco mas cu esey. Motibonan ta varios. E mas principal ta cu e deal cu Valero, no ta cla ainda. Y tanten cu esaki no ta cla, no por presenta e pakete completo na Parlamento pa nan trata e ley completo. Consecuentemente esey lo trece tardansa cu ta pone cu posiblemente e no ta keda cla pa 1 augustus. 

CONFIRMACION DI GOBIERNO

Gobierno a confirma cu tin un retraso chikito, pero no pa motibo di CITGO. "E deal di CITGO si ta full cla, no falta nada" Richard Arends a bisa NoticiaCla.com dialuna. "Djies nos mester cera e capitulo cu Valero pa e ora nos por manda ambos acuerdo Parlamento pa aprobacion" Arends a sigui bisa. Minister Mike de Meza mes tambe a declara na 24ora.com mas prome cu ta haciendo tur cos pa alcansa 1 di augustus ainda. "E por dura algun dia mas, of un siman. Mas hopi cu esey no" e mandatario a sigura. 

RECES DI PARLAMENTO

Loke no ta yuda e situacion, ta cu Parlamento a baha cu reces diabierna ultimo y ta bolbe te mitar di augustus. Sinembargo NoticiaCla.com a haya 'promesa' di lider di fraccionnan di AVP, MEP y PDR cu nan ta riba un standby pa asina e ley drenta Parlamento, nan trata esaki aunke cu ta den reces. Problema sinembargo ta cu a duna tur hende liber y ta bira dificil pa e personal di Parlamento tambe kibra vakantie pa bolbe. Sinembargo a compronde cu tin un plan semper pa casonan di 'emergencia'. Y den e caso aki, considerando e asunto uno di 'interes general', lo haci e sacrificio pa kibra e reces y trata e ley aki mas lihe cu ta posibel. 

DOCUMENTONAN FALTA

Te cu siman pasa diabierna, ningun documento no a yega Parlamento ainda. Pa e ley por wordo trata, mester di tur sorto di documento, session di pregunta manda pa ministernan cu mester wordo contesta na nan turno. Despues ta sigui e aspecto preparativo, reunion den comision central y finalmente un fecha pa trata e reunion publico aki. Fuera di esaki, mester tin tur e documentonan, consehonan legal di tur instancia prome cu esaki por ta cla pa tratamento. For di loke e informacion ta mustra awor, ta parce cu pa mas prome cu esaki por wordo trata ta fin di e luna aki of comienso di luna di augustus. Pero atrobe, esey ta si tur documento a drenta, tur proceso a wordo pasa y cu tur hende a haya tempo amplio pa evalua y studia e ley(nan). Y for di informacion di gobierno, NoticiaCla.com a compronde cu no ta solamente un ley tin, sino varios.