Fayo tecnico na WEB ta dificulta pago di cuenta di awa

ORANJESTAD – Un fayo tecnico den sistema di administracion di cliente di WEB a pone cu por lo pronto no por paga cuenta di awa na oficinanan di gobierno y na ELMAR. WEB ta pidi clientenan pa haci nan pago na oficina di WEB mes, na banco of online. E compania di awa y energia awemainta a habri siman cu un fayo den nan sistema automatisa. Na prome instante tawata mustra cu e sistema lo no ta accesibel ningun caminda. Consecuentemente no por a yuda clientenan cu for di trempan a bin paga nan cuenta di awa. E teamnan di Customer Service y maneho di informacion mesora a bini hunto pa evalua e situacion y den poco tempo a logra lanta e sistema, di manera cu lo por atende clientenan atrobe. Entretanto ta traha duro pa reestablece e contacto entre e sistema di administracion di WEB y e sistemanan di ELMAR y Hulpbestuurskantoornan. Lo mantene clientenan informa di progreso di e trabounan via WEB su pagina di Facebook. Gerencia di WEB ta pidi su sincero disculpa na clientenan pa e inconveniencia. Ta haci tur esfuerso pa normalisa e servicio na clientenan mas pronto posibel. Relaciona cu e inconveniencia, gerencia a dicidi di no cobra e boet di 10 florin, cual normalmente ta cobra ora un cliente paga despues di e ultimo fecha pa paga.