Scol Pa Nos Awards stimulando alumnonan di scol basico

ORANJESTAD - Aña escolar 2015-2016 ta tras di lomba y Madworks, productor di e software escolar Scol Pa Nos, ta orguyoso di presenta e SPN Awards pa e aña aki. 

Scol Pa Nos ta un producto innovativo den enseñanza aki na Aruba, cu cual educadornan por documenta progreso di alumnonan digitalmente pa mayornan por sigui directamente con nan yiu ta bayendo. Cu Scol Pa Nos por mira por ehempel hopi facil y lihe con un alumno a progresa (of no) riba cua vak durante henter aña. Diferente scol aki na Aruba ya ta haciendo bon uzo di e producto aki y pa prome biaha por mira cua alumnonan na cua scol a haci e progreso mas notabel durante ultimo aña escolar. Pa e alumnonan aki - cu no necesariamente mester ta esunnan miho den nan klas, pero mas tanto esunnan cu a traha hopi duro y a logra drecha nan cijfernan na un manera spectacular - a introduci e SPN Award como estimulo. Pues asina, Madworks tin e honor di anuncia e shete muchanan cu segun e sistema di Scol Pa Nos tabatin e progreso mas notabel den nan resultadonan escolar. Pa Scol Primario Kudawecha esaki ta Celina He, na Prinses Amalia Basischool e ta Ian Sabajo y na Reina Beatrix basisschool e alumno cu mas a progreso ta Eliazar Lovius. Na Conrado Coronel, Carluska de Windt su resultadonan a progresa mas duro y na Colegio Santa Teresita ta Nathan Brooks ta e alumno cu a bay mas dilanti. Na Colegio Hilario Angela, Jankelly Montolio a mustra mas progreso cu tur otro alumno y finalmente Stephon Baptiste ta e alumno cu mas a bay dilanti e ultimo aña escolar na Commandeur Pieter Boer School. Tur e muchanan aki ta ganador di e SPN Award y a ricibi un gift certificate di 100 florin cu cual nan por cumpra articulo pa proximo aña escolar. 

Scol Pa Nos ta un producto cu ya caba ta existi 10 aña y a proba su mes di ta un herment util pa educadornan na scol y mayornan na cas. A pesar di e satisfaccion di e scolnan y hecho cu te dia di awe e sistema nunca a wordo gehacked, Madworks ta sigui innova e producto aki. Desde proximo aña escolar, Scol Pa Nos lo bay ta cloud-based, cual lo bay trece hopi mas beneficio pa educadornan y mayornan. E cloud lo bay traha prome pa scolnan basico, pa despues sigui pa e resto di scolnan afilia na Scol Pa Nos. Mas ainda, lo introduci un app pa asina educadornan y mayornan por comunica mas miho cu otro y sigui progreso escolar di nan alumno y yiu ‘real time’. Ya caba e website di Scol Pa Nos a haya un interface nobo cual ta mas facil ainda pa nabega. Fuera di esaki, Madworks a haya aprobacion pa ta e unico sistema escolar online pafo di Hulanda cu por link directamente cu e sistemanan di ‘Wereld In Getallen’ y ‘Taal Actief’. 

Finalmente, Madworks a uni forsa cu XA Technologies e aña aki pa asina forma un compania nobo cu lo bay duna mas servicio ainda na su clientenan. 

Check pa mas informacion riba www.scolpanos.com