Kiwanis Club of Aruba a anuncia “Wine Gala Event”

ORANJESTAD - E aña aki Kiwanis Club of Aruba ta tene nan Wine Gala Event riba diasabra 1 di october 2016 di 8.30 pm pa 2.30 am na Renaissance Conference Center, cu e tema “Casino Royale”. E decoracion lo ta den e tema Casino Royale unda e colornan principal cu lo wordo uza lo ta cora, preto y blanco. Desde yegada lo keda impacta pa e prome impresion den un espacio transforma pa elementonan cu ta laga bo sinti den un ambiente completamente diferente.

Tur fondonan cu wordo recauda durante e evento aki ta destina pa cubri e diferente proyectonan cu Kiwanis Club of Aruba ta ehecuta na beneficio di comunidad durante henter aña. Como ehempel por menciona proyectonan cu ta patrocina manera e clubnan hubenil Key Club Colegio Arubano & Key Club San Nicolas, Action Club,  Builders Club y Circle K EPI na scolnan, pero tambe Back-to-School Project, Christmas Lunch na Imelda Hof, Smile Makers pa cuido dental pa mucha, Bon Bista pa e cuido visual pa mucha, Panda Book contra abuso sexual di menornan, Kamishibai pa stimula contamento di storia pa mucha, Outstanding Student Awards na scol secundario, proyecto di Hisamento di Flie, Campaña di conscientisacion den trafico Don’t Text & Drive, y hopi hopi mas.

Carchinan ta na benta na e suma di Afl. 375 pa dos persona cerca tur miembro di Kiwanis Club di Aruba of via 5678567. Cumprando carchi pa “Casino Royale” Wine Gala ademas di contribui pa un bon causa, bo lo bay goza di un anochi espectacular unda lo tin wine stations, soft drinks, variacion di keshi y un warm buffet. Adicionalmente pa complace tur gusto lo tin un cash bar pa otro bebidanan. E combinacion musical tan spera cu ta priminti di pone tremendo ambiente riba e anochi aki ta Tsunami, ‘N Fuzion, Buleria, y DJ Edson Tromp. E dress code ta gala y e tema ta crea e oportunidad pa bisti cu tokenan elegante pa accentua e anochi di ‘Casino Royale’ cu ta colornan ‘cora, preto y blanco’.  

Un danki inmenso ta bay na e wine suppliers cu e aña aki atrobe –mescos cu tur aña - ta coopera cu Kiwanis Club of Aruba cu nan biñanan ekskisito. E aña aki tin confirma caba e siguiente wine suppliers den orden alfabetico cu lo ta presente riba diasabra 1 di october :

Lo tin varios ‘door prize’ atractivo unda e main door prize lo ta un biahe pa 2 persona pa Las Vegas .

Kiwanis ta un organisacion global di boluntarionan dedica na cambia mundo via di un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwanisaruba.org of Facebook. Tambe por bishita e website di Kiwanis Internacional na www.kiwanis.org