Trahadonan ex Aura Casino cu no bolbe, confia cu por yega na acuerdo

ORANJESTAD - FTA a haya confirmacion di gerencia di Barcelo cu nan a firma un acuerdo cu un operador nobo cu ta ser representa pa e actual manager di Hilton Casino. Esey ta nifica cu e trahadornan di ex Aura Casino tin un dunador di trabou nobo. Awor ta keda e parti cu e compania aki lo mester yega na un acuerdo cu FTA cu ta representa e trahadornan. 

REUNION CU E REPRESENTANTENAN

Prome cu e firmamento cu a tuma lugar aki FTA a reuni cu e representante menciona cu su abogado unda a ser presenta e diferente puntonan. E compania ta di opinion cu basa riba e espacio cu tin nan lo no por traha cu 44 trahador sino 25.  FTA a haci un sondeo entre e trahadornan y ta mustra cu lo por yega na un acuerdo. Di biaha despues di firmamento FTA  a tuma contacto cu e compania cu a priminti di entrega nan proposicion pa un acuerdo e fin di e siman aki. "Nos ta spera berdad cu lo por yega na un acuerdo y cu e casino lo por habri pronto" Dirksz a finalisa bisando. 

CONFIRMACION DI MINISTER 

Tabata diabierna cu minister Paul Croes a anuncia cu un acuerdo a keda firma entre gerencia di Barcelo y e consorcio pa opera e casino. "Ta trata di un acuerdo unda a logra mantene 25 cupo di trabou pa e trahadornan di Aura Casino. Despues di hopi reunion intensivo y negociacionnan, finalmente a logra cu e dos partidonan a firma. Awo ta sigui e negociacionnan cu FTA pa e asunto di pago atrasa y pago di esnan cu lo no continua den servicio di e casino", Minister Paul Croes a bisa den un entrevista.Despues di 6 luna di e cierre di e casino ayera noticia a cuminsa move cu e deal a wordo cera entre e operador y e casino. E casino su espacio a wordo reduci cu 50% pa cual motibo mester a reduci e cantidad di trahadornan na 25. "Naturalmente nos lo a prefera pa tur trahador wordo manteni na trabou, pero asina mes nos ta kere cu esaki ta e mihor resultado posibel.” Croes ta gradici e esfuersonan di Mediador di Gobierno Anselmo Pontilius pa e forma hopi profesional con a guia e proceso. Tambe na FTA cu semper a mantene e opcionnan habri pa sigui negocia. Tambe ta gradici e operadornan y na Barcelo cu a hunga e rol di mas importante. Awor lo sigui negociacion cu FTA pa e trahadornan cu mester busca otro empleo. Minister Paul Croes a anuncia ayera tambe cu lo brinda apoyo na esnan cu mester di otro trabou pa medio di su departamento di Progreso Laboral.Negociacionnan a bay den forma intensivo, pero no a perde speransa nunca cu lo yega na un solucion parcial. Minister Paul Croes a lamenta cu miembronan di oposicion, na luga di pensa riba solucion, semper a trata na kibra e proceso pa busca solucion.