Kooyman y FTA a haya otro porfin (atrobe) y ta firma dialuna

ORANJESTAD - E CAO nobo pa trahadonan di Kooyman ta keda firma dialuna merdia. Asina presidente di sindicato FTA Rudy Dirksz a confirma na NoticiaCla.com. Segun Dirksz, riba diahuebs ultimo e trahadornan na Kooyman miembro di FTA a vota riba e proposicion di e compania y e mayoria a bay di acuerdo cu esaki. Como tal a palabra cu lo firma e CAO dialuna pa 12'or di merdia. 

CONTENIDO DI E CAO

E CAO lo tin un duracion di tres aña. Lo duna un lump sum di Afl 1.500,00 na cada miembro na momento cu firma y cu di awor padilanti e trahadornan lo no ricibi aumento structura mas sino pa medio di un sistema di evaluacion tanto na 2017 y 2018. Tambe lo ser instala un comision di apelacion pa huzga e evaluacion na momento cu empleadonan no ta di acuerdo cu esaki. E orario di trabou ta keda 40 ora pa siman y e tienda ta habri di 7 am pa 7 pm incluyendo diasabra y riba diadomingo ta habri di 9 am pa 2 pm. Pa esnan cu mester cuminsa traha 7 am of cu mester traha te cu 7 pm lo ta riba base boluntario. Cu esaki e lucha di trahadornan pa e CAO aki ta tras di lomba segun Dirksz.