Alerta pa studiantenan contra scam pa camber na Hulanda

ORANJESTAD - Un mayor di un studiante di Colegio Arubano cu a caba gradua, ta buscando su derecho despues di a wordo 'defrauda' pa un scammer profesional cu a costa e alumno hopi placa. Den e caso aki ta trata un scam ora cu e mayor y e alumno tabata buscando alohamiento na Hulanda proximamente. Un odisea cu a laga e alumno 400 euro menos y yen di problema. E caso mientrastanto ta den man di recherche. Y e mama su speransa ta cu otro hende no cay den e mesun trampa. 

A SCAM STUDIANTE

Ta trata di e alumno Croes cu recientemente a caba su VWO cu exito y tabata preparando pa biaha pa Hulanda pa sigui cu su estudio. Den cuadro di esaki el a uza e website cu lo mester tabata uno sigur cu por a garantis'e un lugar di biba, esta www.kamernet.nl. " Esaki el a haci pa e ta safe" e mama Beatriz a bisa. "El a haci e procedura normal y a cumpli cu e pago di 400 euro di deposito. Nan a scam mi yiu y el a perde tur cos" e mama a sigui conta. E yiu mes ta conta cu e persona(nan) ta super bon den nan trabou y dificilmente bo por kere cu ta un scam. Recherche na Aruba tin e caso unda cu a traha proces verbaal y a mand'e caba pa e.o. ministerio publico y interpol. Un di e consehonan tabata pa manda esaki prensa pa asina hende spierta di e practica ilicito aki. "E no ta bay pa e placa so, sino pa e hecho criminal cu nan ta comete cu nos studiantenan. "Mi kier pa adverti tur studiante y mayor pa casonan asi no ripiti" e mama finalisa bisando.