Zona di landa y bufferzone expandi cu boeinan nobo

ORANJESTAD-  E zona di landa y bufferzone expandi cu boeinan nobo di Varadero. Den cuadro cu e Beach Policy, manera previamente menciona, e siman cu a pasa Varadero a cuminsa pone e boeinan den e area dilanti hotelnan, cuminsando na Ritz Carlton te cu Tamarijn.

AREA DI LANDA EXTENDI

Den pasado e “zwemzone” tabata consisti di un area di 50 meter for di canto y e “bufferzone” tabata bay te cu 50 meter mas patras cu esey. Pa por hasi un mihor uzo di nos lama, e “zwemzone” y e “bufferzone” a wordo extendi cu 25 meter cada un. Esaki ta hasi cu awor nos lo conta cu “zwemzones” di 75 meter for di canto y “bufferzones” 75 meter mas afor. Pa crea uniformidad den e area, y pa cada zona por ta claramente marca, Aruba Tourism Authority a financia e colocacion di e boeinan aki. Pa garantisa seguridad di tur usario di nos beachnan y lama, ministerio di turismo hunto cu ATA ta desea pa e pueblo y e bishitantenan hasi uzo solamente di e area destina pa cada actividad. 

ADVERTENCIA PA COMPANIANAN ACUATICO

Tambe kier a adverti tur compañía acuatico y tur otro compañía cu ta hasi uzo di nos beachnan pa tene na cuenta cu e instalacion di e boeinan ta andando y pa tene un distancia pa e team por instala e boeinan di un manera sigur den nos lama. Manera a menciona previamente e instalacion a cuminsa e siman aki y lo dura mas o menos 12 siman pa keda cla cu ful e area dilanti hotelnan. 

Manera a ser menciona caba den un otro ocasion, ta di suma importancia pa nos por garantisa seguridad riba nos beachnan y tambe den nos awanan, tanto pa nos turistanan como pa nos localnan. Pa esaki por funciona optimalmente ta rekeri e colaboracion y bon boluntad di tur usuario di nos lama. E diferente zonanan t'ey pa un motibo y ta pidi pa respeta esakinan pa e bienestar di un y tur. Cu cooperacion di nos tur nos lo logra e meta di e Beach Policy, pa ofrece nos pueblo y bishitantenan playanan organisa y mas segur cu tur por disfruta di dje.