Polisnan y futuro Polisnan a completa curso di “Mobiele Eenheid”

ORANJESTAD - E unidad conoci den boca di pueblo como 'riot comando' pero cu oficialmente ta opera como 'Mobiele Eenheid' (ME), a haya mas miembro y asina ta keda expandi. Nan ta un division di Cuerpo Policial cu ta bay den accion na momento cu tin un demostracion, un calamidad of un evento grandi. Nan training ta hopi intensivo y ta exigi hopi di cada persona fisicamente y mentalmente, como individuo y como grupo. 

EXPANSION

Recientemente a tuma luga e “eindoefening” di un grupo combina pa e curso “grootschalige optreden” cu ta consisti di studiantenan cu ta completando nan opleiding di Scol pa Polis (Grupo M4 2012) y miembronan di Cuerpo Policial. E curso aki a wordo introduci algun aña pasa pa e actual Alto Comisario di polis como un di e cursonan obligatorio pa tur studiante cu ta preparando pa gradua y uni oficialmente na Cuerpo Policial.

CANTIDAD CU A PASA 

Di e 27 cursistanan tabatin 20 studiante y shete miembro di Cuerpo Policial y 20 cursista a completa e opleiding. E shete cursistanan cu no a completa e curso, cu ta hopi pisa, tabata sea pa via cu nan no a logra e parti fisico of e parti mental of nan a sufri un lesion cu a stroba nan di participa na e “eindoefening”.

KICO E TRAINING TA ENSERA 

 E curso ta encera entre otro training riba tereno di detencion, transportacion, con pa traha cu tur ekipo, con pa maneha violencia, tolerancia y control propio “pa no perde cabes” y naturalmente teamwork, asina Humphrey Koolman ta agrega. Como un di e comandantenan di ME, Humphrey Koolman a splica cu e team mester ta bon prepara pa por yega y traha di biaha den cualkier circunstancia. E ta splica cu a establece e team di ME shete aña pasa y a cuminsa cu un training ofreci pa partnernan di Cuerpo Policial di Hulanda. E team a sigui crece y awo e curso di “grootschalige optreden” a bira un parti di e curso di Scol pa Polis.