Rainbow Warriors lo defende derecho LGBT na Aruba

ORANJESTAD - E conocido gremio no gubernamental cu ta fungi como un 'watchdog' na Aruba, Rainbow Warriors, a anuncia diabierna cu nan tambe lo defende derecho di Lesbians, Gays, Bisexuals y Transgender (LGBT) na Aruba. E resolucion pasa dia 30 di juni 2016 na Nacionan Uni, ta proteha contra y discriminacion basa riba orientacion sexual y identidad di genero.  Basa riba e resolucion aki, Rainbow Warriors hunto cu e comunidad LGBT na Aruba lo ataca tur esnan cu ta viola esaki. 

CU ACTO POR DENUNCIA DISCRIMINACION

Cu e acto aki awor ta bira posibel na un nivel internacional denuncia na Naciones Uni discriminacion y violencia contra esnan di orientacion sexual y identidad di genero no heterosexual esta e comunidad LGBT. Basa riba e resolucion aki Rainbow Warriors Core Foundation en estrecho colaboracion y dialogo cu comunidad LGBT na Aruba lo determina strategia pa ataca tur esnan na Aruba, sea partido politico, clero, cualkier organisacion of individuo cu haci su mes culpabel na discriminacion of violencia contra e comunidad LGBT na Aruba. Como parti di tres red grandi mundial di derecho humano Rainbow Warriors Core Foundation lo alaves fiha campaña internacional di prensa pa denuncia e actonan abierto di discriminacion contra e comunidad LGBT na Aruba dor di e pastor Szpila e demas clero y lo haci denuncia na Vaticano.

RECURSO INTERNACIONAL NA DISPOSICION

Como organisacion internacional cu a para hunto cu e comunidad LGBT desde e principio pa defende nan derechonan nos lo para nan tras y haci e compromiso pa pone nos recursonan internacional na nan disposicion incondicionalmente. Rainbow Warriors ta finalisa mustrando cu e lema 'LGBT Rights are Human Rights'.