Aki dos siman ta procesa cedula atrobe na Aruba!

ORANJESTAD - Despues di hopi aña, entrante 18 di juli 2016 Censo por duna servicio di cedula atrobe. Cu un retraso chikito (a anuncia cu esaki lo a cuminsa for di juni caba) y for di e comunicado di Censo, nan ta informa e proceso lo ta bay ta hopi mas facil cu antes.  E cedula ta wordo produci na Aruba mes y lo wordo duna mes ora na e cliente.  

PROCEDURANAN NOBO  

Censo a hinca hopi esfuerso y tempo den e descripcion di e proceduranan nobo pa cu e produccion di e cedula. Seguridad, servicio y rapides ta palabranan esencial den henter e procedura. E cedula aki lo wordo produci na Aruba mes y ta cumpli cu tur e requisitonan internacional di seguridad. Tambe e proceso di peticion y otorgamento di cedula lo ta hopi mas simpel y liher; pa e Cedula nobo bo persona lo tin cu acudi na Censo un biaha so.  E cedula lo keda cla mientras bo ta warda riba dje.  

KICO E PROCEDURA TA PA MI POR HAYA MI CEDULA? 

Pa por ricibi e cedula, e persona mester haci un cita.  

E ta hopi facil pa haci un peticion pa un Cedula:  

1) haci un cita via www.censo.aw  

2) durante e cita, CENSO lo saca un portret dibo y e firma lo ta digital    

3) e Cedula ta wordo imprimi y por wordo uza di biaha  

REACCION DI HEFE DI CENSO

“Awor e cliente no mester bin dos biaha mas Censo, e por djies warda riba su cedula ”, segun Sharin Luydens, hefe di Censo. ”Y esey ta un diferencia grandi cu antes” e ta remarca. “Den pasado e tabata tuma mas o menos tres siman pa por produci e cedula na Hulanda. Tambe e cliente mester a bin Censo dos biaha: un biaha pa pidi e cedula, y otro biaha pa bin busc’e. Awor bo ta keda cla den un bishita”, Luydens ta añadi.  

RETRASO 

Luydens ta reconoce cu tin un retraso den e produccion di cedula. “Durante full e periodo cu e sistema nobo a wordo desaroya, Cedula no por a wordo produci.” Luydens ta splica. “Pero cu e sistema nobo nos ta spera cu e retraso aki pronto lo wordo resolvi.  

''Desde 1 juli diferente testnan a wordo haci pa asina garantisa cu e producion di ID lo bay bon. Esaki lo wordo sigui door di un soft launch y nos lo ta cla pa e trabou grandi mes'' segun Luydens.  

Bo persona kier pidi un Cedula nobo? Haci un cita via www.censo.aw . Prijs di Cedula ta Afl 40,-.  

Mas informacion?  

Pa mas informacion, subi www.censo.aw.