WEB ta cubri dak di Abraham de Veer school cu panel solar

ORANJESTAD – Despues di a instala panelnan solar riba dak di Scol Kudawecha, awor ta na beurt Abraham de Veer School. Awe diabierna a tuma lugar e inicio oficial di e proyecto na e scol na San Nicolas. Den presencia di mandatarionan, gerencia y alumnonan di e scol, a desvela e borchi cu informacion di e proyecto. E dak solar di e scol ta forma parti di un proyecto mas grandi, esta di un ‘Decentralized Solar Photovoltaic Integrated Project’ (DSPVIP). E proyecto integra di panel solar decentralisa lo trece WEB mas cerca di logra su vision di ta Greener, Cleaner y Fuel Oil Free na 2020. E trabounan di instalacion ta cuminsa dialuna awor dia 11 di juli y ta planea pa termina na october di e aña aki. Na Abraham de Veer School lo cubri un total di 8 dak cu 714 panel solar di 300 W. Esakinan lo por genera un total di 214.2 kWp. Director Luis Oduber di WEB a expresa su gratitud na director y alumnonan di Abraham de Veer pa e confiansa y disponibilidad pa uzo di e dak. 

TAREA PA INICIA PROYECTO

Aña pasa, Utilities Aruba a haña e tarea di comision di energia di gobierno di Aruba pa inicia un proyecto pa genera energia solar door di cubri daknan di scolnan y otro edificionan publico cu panelnan solar. WEB a haña e tarea pa ehecuta e proyecto aki cu colaboracion di Utilities Aruba, ELMAR, DOW, TNO y Carbon Warroom/Rocky Mountain Institute. E prome edificio publico cu a haña panel solar di WEB, tawata MFA na Noord. Pa lo cual ta e scolnan, a delibera cu Ministerio di Enseñansa y a inicia un estudio di e condicionnan di e daknan di e scolnan y tambe biblioteca nacional. No tur dak y localidad di dak ta apto pa pone panel solar. 

DIFERENTE CRITERIA

A analisa un total di 80 scol y biblioteca riba diferente criteria. Finalmente a scohe 15 scol y biblioteca apto pa un sistema di panel solar riba nan dak. E prome scol cu a haña panel solar tawata Scol Basico Kudawecha. E construccion di e dak di e scol ey a rekeri menos modificacion y tin e capacidad instala mas halto. Cu e proyecto aki WEB ta amplia su red di energia solar uzando e daknan di scolnan y edificionan publico. Un ‘dak solar’ no solamente lo conduci na un produccion di coriente mas limpi y sostenibel. E ta un ehempel bibo tambe pa conscientisa nos muchanan di e importancia di reduci emision di gas venenoso (CO2) den medio ambiente. 

DSPVIP

E proyecto na Abraham de Veer School ta forma parti di un proyecto mas grandi cu ta e ‘Decentralized Solar Photovoltaic Integrated Project’ (DSPVIP).E DSPVIP ta consisti di dos proyecto. E prome proyecto ta esun di e panelnan solar riba scolnan y otro edificionan publico cu un capacidad calcula di 2.5 MWp. E di dos proyecto ta consisti di un parke solar grandi cu un capacidad calcula di entre 3 y 5MWp.