Grupo di trahado kier pidi bancarota pa Tiara Air

ORANJESTAD - Un grupo di trahado di e aeroliña Tiara Air ta hopi disgusta, y si ta pa nan, ta cla pa haci peticion pa declara e aeroliña bancarota. Casi tres luna despues cu e compania a haci un intento pa reanuda su operacion cu un buelo pa Corsou, esaki a keda te ey tambe debi na un problema 'operacional tecnico'. E hecho cu e compania no ta generando entrada, a pone cu awe e compania su situacion financiero ta di tal forma cu e ta forsando trahadonan 'actual' pa retira pa asina baha e gastonan aun mas. Algo cu e trahadonan 'actual' no a y ta apreciando y a dicidi cu ta basta!

PRESION PA FIRMA

For di loke cu NoticiaCla.com por a confirma, hopi trahado cu ta den servicio awor (compara cu e grupo cu a perde trabou y ainda ta wardando nan pago) no a wordo paga ainda. No por a confirma si ta solamente salario di juni of mas luna atras cu e trahadonan mester ricibi placa. "Ainda nan no a paga nos. Nan ta yama empleadonan aden pa menasa nan" ta informacion cu NoticiaCla.com a ricibi di algun trahado e siman aki. Un trahado a splica NoticiaCla.com cu pa motibo di problema (debe) financiero, e no tabatin otro salida sino di firma su retiro, y sikiera asina haya algo di placa pa por sali di su debenan. Algun a perde cas, auto y tin miles di debe na utilidad. Debenan astronomico pa falta di lunanan di pago di salario a pone cu e trahado aki y otro ta cu lomba contra muraya y a firma pa nan salbacion financiero temporal. "Algo ta mas cu nada. Mi no por a sigui biba asina" un di e trahadonan a sigui bisa. 

POSIBEL BANCAROTA DI E COMPANIA

Sea tabata forsa trahadonan firma un 'leave of absence' of nan retiro, y asina nan tabata haya nan salario 'mesora'. Y a compronde cu asina tabatin un grupo bou presion cu a firma. E otronan,- cu ta un grupo basta grandi -, a opta pa no firma aunke cu esey por nifica cu nan no ta haya placa y consecuentemente nan retiro. E grupo aki a bay direccion di labor cu na nan turno a conseha e grupo pa no firma nada. A compronde cu e grupo ta bastante disgusta cu ta yegando mitar di luna y ainda no a haya nan salario (atrobe). "Y tin un par di trahado cu tin pensa pa pidi pa bancarota di e compania!". Algun trahado a bisa NoticiaCla.com cu aunke cu nan a firma caba pa haya nan placa, nan ta dispuesto tambe pa firma si mester, pa pidi bancarota! "Nos lo haci'e!" e trahadonan a sigui bisa. 

BUELO PA CORSOU

E compania despues di tabatin problema serio financiero for di 2013, a medio saca cabes riba awa y a inicia nan operacion riba 11 di april ultimo cu un buelo pa Corsou, yena cu prensa. E momento ey e director doño di e compania a splica NoticiaCla.com cu e loke cu e compania a pasa aden, tabata un 'tempestad'. A confirma e tempo ey cu parti di e motibo di inicia buelonan pa Corsou, tabata pa genera fondo pa yuda paga e trahadonan e fin di luna ey segun un sentencia di hues. A te hasta participa cu 3 siman despues di e buelo pa Corsou, lo a cuminsa pa Punto Fijo dia 2 di mei. Buelo cu nunca no a subi tampoco. Pero e momento ey, e alegria y euforia tabata halto ya cu e compania conoci como 'e aeroliña di Aruba' tabata back in business. 

EUFORIA CORTICO

Pero e euforia no a dura largo ya cu for di Corsou caba e notificacion a bin cu mester a 'ground' e avion pa falta di un pieza crucial. Pero pa 'buena marcha' a laga e capitan lanta buelo pa e avion no mester keda 'pega' na Corsou. Unabes na Aruba, e avion a keda geground, y nunca mas a subi. Loke ta mas interesante ta cu ningun declaracion a wordo haci pa cu e situacion ey y te cu awe, ningun declaracion a bin di parti di gerencia, cu a opta pa no haci ningun declaracion. Tres siman despues di e grounding di e avion, porfin a manda e pieza Merca pa wordo drecha. Pero nada mas no a wordo scucha, y ta te cu  cu e siman aki atrobe, cu e grupo 'nobo' di trahado den servicio, a cuminsa protesta mirando cu, mescos cu e situacion di e trahadonan anterior, no ta parce di ta hayando nan placa. A lo menos no den un forma normal. Sea ta firma pa retiro, pa haya e placa, of ta keda sin placa.