ABC cu campaña pa hala atencion di gobierno riba areanan berde

ORANJESTAD - Aruba Birdlife Conservation ta bay organisa campañanan local y internacional pa rescata areanan importante di naturalesa na Aruba. ABC a haci e anuncio awe, basa e.o. riba e reaccion di gobierno di Aruba pa continua su plan di cambia e ROP (Ruimtelijke Ontwikkelings Plan) pa inclui mas area cu posiblemente ta berde awor. Esey no ta kita afo cu ABC ta contento cu e resultado di e ultimo casonan legal pa rescata areanan natural den Bubali Plas. Ta premira cu lo tin mas caso legal den e di dos mitar di 2016.  

GOBIERNO TA IGNORA MOCION DI PARLAMENTO

ABC ta relata cu nan a nota cu no obstante e hecho cu tur 21 parlamentario a vota pa un mocion dia 6 di februari 2013 pa duna 16 area un status di proteccion special pa haci nan parti di Parke Nacional Arikok, 'gobierno a ignora e deseo aki di Parlamento". "Lamentablemente nos a tuma nota di e intencion di gobierno pa move liher y adapta e ROP pa por cambia status di varios area protegi pa por continua cu e construccion di aun mas hotel y condominium" ABC ta bisa. Como consecuencia di esaki, ABC a dicidi di organisa un campaña nacional y internacional pa rescata e areanan aki (incluyendo esnan na Bubali Plas) di mas destruccion y pa protehanan bou di Parke Nacional Arikok. ABC ta mustra cu nan ta convenci cu gobierno ta seriamente subestima con amplio e sosten ta pa proteha e areanan importante natural aki, tanto local como internacional. "E intencion di e campaña ta pa demostra na gobierno con grandi e sosten ta, y pa medio di esey convence gobierno pa para e destruccion di e aeranan aki." E preparacion pa e campaña aki a cuminsa diahuebs 7 di juli, 2016 segun e comunicado di ABC.