Amienda 'Union Civil' entrega na Parlamento

ORANJESTAD — E amienda pa e buki nobo di codigo civil cu ta trata union civil irespecto e orientacion sexual a keda presenta na Parlamento di Aruba. Parlamentario Desiree de Sousa-Croes a bisa cu e por conta awor cu por lo menos 10 di e minimo 11 voto necesario pa por aproba e amienda. Remarcabel ta cu e amienda -cu ta contene tur aspecto huridico di un matrimonio homosexual - ta conta cu sosten di prome minister Mike Eman. 

De Sousa-Croes kier a registra matrimonio di mesun sexo den e codigo civil caba, pero no por a conta cu un sosten mayoritario den su propio fraccion. Finalmente ela resulta den un amienda pa union civil unda cu tur otro aspecto huridico y notarial di un matrimonio ta wordo regla, excepto e derecho pa casa pa ley. 

FALTA DI SOSTEN

Prome cu el a entrega e amienda cerca presidente di Parlamento Marisol Lopez Tromp, de Sousa a bisa cu tanten no pone un fecha pa e tratamento di e ley di codigo civil, elo a cuminsa un tipo di 'accion di morocoy'. Algun a interpreta esaki cu e lo no a vota pa otro leynan y cu fraccion no por a conta cu su sosten. Pero clarificando esaki pa NoticiaCla.com, de Sousa a bisa cu esey no ta e caso. Pa loke ta su accion di morocoy, de Sousa a bisa cu el a opta pa esey pasobra e tabata sinti cu ni di su fraccion ni di lider di partido Mike Eman e tabata ricibi un contesta cla pa sosten riba su amienda, unda cu union civil ta wordo regla, tampoco pa esun di mesun sexo. E falta di sosten di su partido tambe a conduci cu (manera cu NoticiaCla.com a raporta prome caba) e no ta pone su mes disponibel pa e proximo eleccion y cu e ta bandona politica. 

22 AUGUSTUS

E menasa di de Sousa tabatin resultado pasobra mesora a pone un fecha pa trata e ley, cu ta dia 22 di augustus proximo. Ademas de Sousa a sigura cu e por conta cu sosten di lider di partido y premier Mike Eman, cu prome tabata basta reserva riba union civil y matrimonio di mesun sexo. Eman lo a pidi de Sousa tambe pa recapacita su desicion di bandona politica. De Sousa a bisa cu esaki ta depende di e votamento na augustus. 

DENUNCIA CONTRA PASTOOR 

No ta custumber cu un luna prome cu trata un ley, un amienda ta wordo entrega, pero segun de Sousa, e intencion ta pa su coleganan parlamentario tuma e tempo pa dicidi riba e amienda. E parlamentario a bisa te hasta cu e ta dispuesto pa divorcia cu su pareha Bevinda de Sousa, pa despues por casa na Aruba atrobe ora cu matrimonio di mesun sexo wordo legalisa riba e isla.

Bevinda de Sousa mientrastanto a haci denuncia diahuebs cerca Diocesis di Willemstad, contra pastor Daniel Szpila di parokia di Dakota. Szpila a anuncia diadomingo durante su predicashi cu si un amienda wordo entrega na Parlamento, esaki ta 'prome biaha ley na Aruba cu ta bay contra ley di Dios", segun e pastor. E pastor a instrui su siguidornan pa pone presion riba politiconan pa vota contra matrimonio di mesun sexo. Segun de Sousa, e predicashi aki lo a conduci na menos sosten pa e amienda. E amienda a keda sostene pa coleganan parlamentario Mervin Wyatt Ras y Rene Herde.

Pa Ariën Rasmijn   Caribisch Netwerk  Foto: Ariën Rasmijn