Un total di 117 trahado nobo a inscribi riba un solo dia

ORANJESTAD - Un total di 117 trahado nobo a inscribi riba un solo dia na SVB. “E cambio haci den e fondo di SVb a duna su fruto den poco tempo y esaki a sali mesora na bienestar y proteccion di e trahado caminda cu nan derecho na seguro ta ser reenforsa den su totalidad”, asina Edwin Jacobs, director di Banco di Seguro Social (SVb) a duna di conoce durante un reunion cu Minister di Salud Publico Alex Schwengle. 

CAMINDA LARGO    

Na prome luga, Jacobs a expresa cu e ley aki a cana un caminda largo y a pasa den diferente fase. Minister Schwengle a para tras di e ley aki y a zorg pa guia esaki te na ultimo. Durante e proceso a bin dos amienda importante cu a contribui na mehora e posicion di SVb den loke ta ehecucion y control riba aplicacion di e ley aki. E parti di e boet administrativo y a aumenta e premieloongrens te na Afls 5850,=. 

EFECTO DI PARTI BOET

E efecto di e parti di e boet desde cu el a drenta na vigor durante e prome 6 lunanan di e aña aki, netto a crece cu 2500 trahado extra compara cu aña pasa. Mitar di esaki, esta 1250 a wordo inscribi despues cu e cambio di e ley a pasa den parlamento, esta  28 di april cu 1 di juli 2016.

LEY DI BOET TA YUDA PREVENI COMPANIA TRAHA ILEGAL

 E ley aki di boet ta yuda pa preveni companianan traha di un forma ilegal y awor aki a core inscribi e companianan bek. 1 di juli a inscribi 117 trahado locual ta un cantidad record pa SVb riba un dia.  Banda di esaki a cuminsa drenta yamadanan anonimo pa indica unda tin trahado cu no ta sigura locual ta mustra cu "e cambio den ley aki ta bay percura pa cobertura di proteccion social pa nos comunidad yega berdaderamente na e grupo pa cual e ley di seguro di malesa existente a wordo traha p'e", asina e director di SVb a enfatisa.

TUR TRAHADO MESTER TA SIGURA

Tur trahado den sector priva mester ta sigura. No por permiti cu den siglo 21 tin trahadonan sin proteccion social contra malesa y accidente, e director a enfatisa. Banda di esaki, e ahustacionnan cu a bin pa sanea e fondo ta mira cu ta bay tuma luga den e proximo 4 pa 5 añanan. Hunto cu ne, pareu ta bay tin un transformacion di SVb.

INFORMACION NA DIMAS 

A base di intercambio di informacion cu DIMAS cu a cuminsa na 2013 y a wordo intensifica e ultimo añanan a haya indicacion cu 1/3 parti di e personanan cu tin permiso di trabou pa traha na Aruba no ta registra na SVb. Esaki ta un desaroyo preocupante, Jacobs a expresa. "Trahadonan na Aruba, ilegal of legal tin derecho riba proteccion social. Nan mester ta inscribi na SVb pa asina por traha trankil", el a agrega. E ley di seguro di malesa conforme tratadonan internacional di Organisacion Internacional di Labor, ta indica cu tur trahado, sin importa su status di inmigracion, tin derecho riba proteccion social. Nan tin derecho pa traha proteha contra malesa y accidente, e director di SVb a subraya.