Churandi Martina ta gana e prome medaya di oro pa EK Atletiek 2016

AMSTERDAM - E atleta yiu di Corsou Churandy Martina (32) a gana e prome medaya di oro pa Hulanda (y Corsou) diahuebs riba e di dos dia di e Campeonato Europeo di Atletiek.  Martina tabata esun mas lihe riba e disciplina di 100 meter. E resultado tabata un sorpresa mirando cu Martina a clasifica como esun mas lento di e grupo pa e final. 

DANKI NA HULANDA 

"Danki na henter Hulanda (y Corsou) mi a haci loke mi tabata kier" Martina a bisa durante un entrevista na NOS. "Cerca di e finish mi tabata sa cu lo por a gana y ora mi a wak mi a kere cu mi a gana" Martina a sigui bisa. Su tempo di 10,07 no ta su miho tempo si (e tin e tempo di 9,9) pero e tabata suficiente pa gana e Turko Jak Ali Harvey. Cuater aña pasa Martina a bira campeon Europeo caba. E ta representa Hulanda debi na un tecnicalidad cu ta prohibi'e di representa Corsou. For di tempo cu Corsou a haya su status nobo na 10-10-10, esaki a bira un problema.