Extra autoridad pa SVb impone boet tabatin efecto positivo

ORANJESTAD - Extra autoridad pa SVb impone boet tabatin efecto positivo. Asina minister di salud publico a bisa durante su reunion cu director di SVb,   Edwin Jacobs. E bishita tabata pa haya un update riba cambio den e ley nobo di SVb cual awor a cambia pa loke ta boet administrativo y pago di cesantia. Schwengle a laga sa di ta sumamente satisfecho. El a bisa e ta haya cu semper den nos comunidad ta un responsabilidad di e doño di trabao pa cuida su trahadonan y pa salvaguardia nan derechonan riba siguridad social.

RESPONSABILIDAD NA DOÑONAN DI TRABOU

E cambio den e ley ta haci esaki mas duidelijk y ta pone e responsabilidad na e doñonan di trabao. "Mi ta contento di tende via di SVb cu e ley tin su efectonan. Tin hopi dunado di trabao cu si ta bay inscribi na SVb”, asina e mandatario encarga cu maneho di salud publico, bou cual Ministerio SVb ta resorta, a enfatisa. Dunando SVb e autoridad di impone boet administrativo tin su efectonan positivo y tabata algo necesario ya cu hopi dunado di trabao no tabata cumpli. 

TA SOSTENE SVB 100%

"Mientras cu mi ta Minister mi lo sostene SVb 100% pa esunnan cu no ta cumpli pa bay over pa un boet", e mandatario a enfatisa. E ley no a wordo traha pa perhudica ningun negoshi, pero cada comerciante tin nan responsabilidad pa carga y esey no ta kita cu e trahado tambe tin responsabilidad, el a agrega.

“Mi ta hopi contento cu e cambio di ley a pasa. El a pasa un tiki retrasa. E  intencion tabata pa bin cun´e aña pasa caba pero door di e circunstancianan y e drukte riba e departamento di ley tabata hopi pisa. Nos a haya nos obliga di sigui e aña aki”, Minister Schwengle a indica.

BOET DI 500 MIL FLORIN

E boet den e casonan aki pa no ta registra por acumula y alcansa e suma grandi di hasta 500 mil florin, Minister Schwengle a laga sa.