Aruparking: Mas y tienda uniendo na campaña di Back to School

ORANJESTAD - Campaña di Back to School di Aruparking conhuntamente cu comerciantenan den centro di ciudad ta bayendo sumamente positivo. Asina Aruparking ta informa pa medio di un comunicado. Diabierna siman pasa a cuminsa cu e campaña cu lo sigui bay te cu september. 

UNI FORZA CU COMERCIANTENAN

Aruparking a uni forza cu comerciantenan den caya pa asina conhuntamente por ofrece e clientenan algo special. A acerca tur tienda den e zona cu Aruparking ta opera pa forma parti di e campaña y for di cuminsamento varios tienda a reacciona positivamente pa cu esaki y durante e siman aki varios otro a uni nan mes y sin duda algun lo mira mas durante e dianan nos dilanti. 

IDENTIFICA CU STICKER

Clientenan por identifica e tiendanan participante a traves di un sticker specialmente diseña pa e campaña cu ta encera cu pa cada compra di 35 Florin e cliente lo ricibi 1 Florin di descuento, es decir, lo mester paga 34 Florin. Pa cada compra di 50 Florin e cliente lo ricibi 2 Florin descuento, pagando 48 Florin. Pa compranan di 100 Florin of mas na e tiendanan participante, e cliente lo por pasa cu e recibo na Aruparking y lo ricibi completamente gratis un smart card cu 10 Florin riba dje pa por uz'e durante su siguiente bishitanan den caya.

TIENDANAN PARTICIPANTE

Aruparking ta wak cu di e forma aki conhuntamente cu comercio por promociona Caya Betico Croes pa cada bes mas hende por yega y sostene comercio local. E tiendanan cu ta participando den e campaña ten a e momentonan aki ta Collins, Dolce Gabana, Shoeballoo, Paleis Oriental, Lian Gift Shop, Boolchands, Friends of God, Angelo Fashion, Jeans Alley, Diesel, La Martina, Shoeballoo Sports, Sams, Pandora, Sun Specs, Mango, The Sting, Wulfsen & Wulfsen, RadioShack, StarFashion, Sport Caribe y Cilo.

Den apenas 1 siman di tempo ya caba Aruparking a haci entrega di aproximadamente 100 smartcards cu 10 Florin di credito riba nan, promocionando asina pa e clientenan por yega bek den centro di ciudad pa sigui haci nan compras den un ambiente hopi agradabel y sosteniendo nos comercio local.