2 posicion di parkeo nobo pa avion na Aeropuerto di Aruba

ORANJESTAD – Aeropuerto di Aruba tin dos posicion di parkeo nobo (extra). Aruba Airport Authority N.V. (AAA) den su afan continuo pa keda cumpli cu e demanda creciente den trafico aereo, a completa e prome fase di e “West Apron Redevelopment Project”, e prome paso di e 3 fasenan pa e parti west di aeropuerto, yegando 16 miyon florin di inversion.  

POSICION PA AVION TIPO B737-A320

E finalisacion di fase 1 a percura pa 2 posicion di parkeo pa avion nobo pa avionnan cu ta cay den di e categoria “C” (B-737/ A320) di avion, como tambe un entrada nobo na e taxiway, cu ora esey keda finalisa den fase 2, lo duna Controladornan di Trafico Aereo mas flexibilidad ora di coordina e operacionnan na tera. E Proyecto ta ensera tambe e provision pa haci “hydrant fueling” bou di tera; lusnan LED pa reduci e uzo di coriente, y un diseño cu lo complimenta e expansion pendiente di e terminal, cu ta wordo spera di cuminsa na comienso di 2017.  

INICIO DI PROYECTO

E Proyecto cu a cuminsa na juni 2015, lo añadi e capacidad necesario pa parkeer avion y brinda flexibilidad operacional pa asina aeropuerto por maneha e volumen di trafico den “peak hours” mihor, specialmente den e temporada halto di winter. 

“Esaki ta djis un paso chikito, pero importante den e plan di desaroyo total pa aeropuerto. Nos ta constantemente desaroyando y sigui mehora nos facilidad pa beneficio di no solamente e aerolinea y pasaheronan, pero tambe pa e resto di isla. Aeropuerto di Aruba ta conciente di su impacto riba e economia y p'esey a compromete su mes na un strategia a largo plaso pa keda dilanti di e demanda y sigura cu aeropuerto por ta prepara pa e demanda creciente di bishitante pa nos isla. Nos ta convenci cu e 16 miyon florin di inversion lo yuda nos mantene nos posicion lider den e industria di aviacion y aeropuerto”, asina James Fazio, CEO di AAA a bisa.