Caha y loketnan na WEB cera debi na walk out

ORANJESTAD – Trahadonan di WEB a tene un walk out awe mainta cu a pone cu parti di e operacion a wordo afecta. Entre nan WEB a informa cu e cahanan y loketnan di WEB Aruba na Balashi ta cera te proximo aviso. Asina e compania di awa y energia ta informa pa medio di un comunicado. E grupo di empleado cu a walk out no ta di acuerdo cu un decision di gerencia pa no yena algun vacatura cu tin den nan departamento. 

MAS DI E WALK OUT

Diahuebs mainta empleadonan di Customer Service di WEB Aruba a pone trabou abou y a walk out. Hunto cu sindicato SIWA nan a expresa nan protesta contra e decision di gerencia pa no yena vacaturanan na e departamento. Gerencia di WEB a tuma e decision aki, pendiente un evaluacion pa logra mas eficiencia den futuro. Actualmente e trabou ta wordo haci pa contratistanan.

PAGA VIA OFICINA DI GOBIERNO OF BANCO

Ta pidi clientenan di WEB pa haci nan pago di cuenta di awa na oficinanan di gobierno, via banco of na oficinanan di ELMAR. WEB ta compronde e inconveniencia pa clientenan. P’esey lo pospone e ultimo fecha di pago di e cuenta di awa di mei, di 8 pa 13 di juli. Ta premira cu lo bira hopi druk na e loketnan di ELMAR, pa motibo cu e fechanan di ultimo dia di pago lo coincidi cu esun di ELMAR. WEB ta pidi disculpa pa e inconveniencia. 

DISCULPA DI WEB

Gerencia di WEB ta pidi su sincero disculpa na clientenan pa e inconveniencia. Ta haci tur esfuerso pa normalisa e servicio na clientenan mas pronto posibel.