Reces complicando tratamento ley all inclusive y di CITGO

ORANJESTAD - Ni e ley pa aproba e deal di CITGO, ni e ley di all inclusive lo wordo trata prome cu reces, cu tur su consecuencia cu esaki por tin. Un ley no a ni yega Parlamento mientras cu e otro a yega, pero falta informacion pa por trat'e. For di varios fraccion sinembargo, NoticiaCla.com a haya e indicacion cu nan ta dispuesto pa traha (por lo menos esun di CITGO) durante reces pa por cumpli cu e fecha di 1 augustus pa e refineria por cuminsa opera. E otro ley importante pendiente y 'popular' di all inclusive si ta parce di lo wordo trata te despues di reces.  Por lo menos segun informacion cu NoticiaCla.com tin di Parlamento.  Presidente di parlamento Marisol Lopez Tromp a confirma na NoticiaCla.com cu tanto e ley (di CITGO)  como esun di all inclusive no ta cla pa wordo trata ainda. A lo menos cu yama un reunion di urgencia durante reces. Pero esey e no por a contesta.  Pa completa e obra, 4 miembro di fraccion di AVP a biaha pa Parlatino e siman aki y ta bolbe te otro siman, cu ta nifica cu posibelmente no tin quorum. Esey sinembargo, segun lider di fracccion berde no ta culpa di AVP y esey no mester ta e motibo di discusion.   

PRESIDENTE DI PARLAMENTO

Segun Lopez Tromp a splica NoticiaCla.com, e documentonan di e ley di CITGO no a yega Parlamento ainda, pues no por a trata esaki. Algo cu tur fraccion a admiti tambe. Pa loke ta all inclusive segun Lopez, esaki enberdad a drenta Parlamento, pero no por wordo trata ainda. Segun Lopez e motibo ta e.o. cu el a reuni cu e tres lidernan di fraccion esta  Herde (AVP), Wever Croes (MEP) y Bikker(PDR) riba e preparacion di tratamento di e ley di all inclusive, y aki dos (2) fracccion (MEP y PDR)  a pidi pa prome cu trat'e ley den Parlamento, pa Parlamento haña: 1. E investigacion haci riba all inclusive na 2015, 2. Un conseho huridico riba e ley door di Raad van Advies pa wak entre otro si e ley aki cu kier regel all inclusive por medio di vergunningsverordening no ta contra nos constitucion. 3 Haña info di e investigacion cu Centrale Bank lo a haci. " A base di esey como voorzitter mi a manda 3 carta afor: un pa Raad van Advies pidiendo nan advies, un pa CBA puntrando riba nan onderzoek cu nan lo haciendo riba all inclusive y si Parlamento por haña resultado pa wak, y un pa minister pidiendo e rapport/ onderzoek" Lopez a sigui bisa. "Te cu awo ta minister (so) a contesta mandando documento y contestanan pa Parlamento" e presidente a sigui bisa. "Ademas", Lopez ta sigui bisa "Tur hende, incluyendo lider di fraccion di AVP sa cu e respectivo minister di turismo cu mester ta presente pa trata e ley, ta den exterior for di 28 di juni y ainda no a bolbe Aruba. Pues dificilmente por trata e ley siendo cu e minister no tey". 

FRACCION DI AVP

Pa loke ta e lider di fraccion di AVP, Rene Herde, el a confirma cu enberdad 4 miembro a biaha pa atende reunion di Parlatino e siman aki. Pero esey, segun Herde, ta despues di a warda te ultimo rato sin tende di presidente di Parlamento, cu te cu diaranson atardi ainda no a yama ningun reunion. Ademas segun Herde, no ta bay pa ken a bay Parlatino y ken no.  "Te na ultimo momento ayera prome cu 11'or tur hende tabata den espera pa desicion di presidente di Parlamento" Herde a bisa. " E no a yama niun reunion pa awe ni pa mayan diabierna. Esey apesar di nos peticion explicito, ripiti y por escrito. Nos tin simannan ta warda pa e yama e reunion. Ora a bira bisto ayera mainta laat cu presidente di Parlamento no lo bay yama e reunion, e hendenan a dicidi di sigui cu nan biahe. Nan a tuma e desicion aki te na absolutamente ultimo momento ayera mainta" Herde a sigui bisa. E lider di fraccion a sigui bisa cu tin dos reunion en particular cu nan a pidi explicitamente pa tene cu urgencia. Un di nan ta e ley pa introduci un instrumento pa regula crecemento di hotelnan 'all unclusive'. "Mi tin tres siman ta pidi pa tene e reunion riba e rema aki. Te cu ayera, diaranson mainta, mi tabata urgi presidente di Parlamento pa yama e reunion riba e ley pa regula "all inclusive" hotels. Mayan diabierna ta e ultimo dia di trabou prome cu vacantie. Nos tabata kier a tene e reunion aki - cu ta completamente cla pa atende - prome cu vacantie. Si e reunion a wordo yama door di presidente, niun hende lo a biaha. Esey tabata e palabracion. No por bisa awe cu no tin quorum mayan, siendo cu te ayera ainda e por a yama e reunion y niun hende di fraccion di AVP lo a biaha. E reunionnan di parlamento semper tin prioridad" Herde a sigui bisa. Mientras cu e ta admiti cu 4 miembro di su fraccion a biaha, e ta sigura cu te cu awor, niun miembro di fraccion di AVP a bay cu vacantie. Herde a mustra cu di otro banda, di oposicion tabatin varios stul bashi "hasta den e reunion di 5 ora cu gobierno riba reapertura di refineria. Nos ta wak potretnan di nan den exterior hasta riba facebook" Herde a sigui bisa. Ademas a mustra cu ta sigura cu si e ley di CITGO drenta Parlamento durante reces, fraccion di AVP completo lo ta presente pa trata esaki. Pa loke ta e ausencia di MEP, Herde ta mustra cu pa simannan largo apenas cuatro miembro di MEP y tin biaha tres ta bin trabou! " E ausencia di sra. Wever-Croes ta hustifica. Ta otro miembronan no ta bin trabou of ta den exterior y no pa trabou" Herde a finalisa bisando.   

FRACCION DI MEP

For di lider di partido y di fraccion MEP Evelyn Wever Croes, NoticiaCla.com a compronde cu ningun miembro di su fraccion y partido a bay Parlatino. "Niun a bay. Nos ta coopera fuertemente pa baha gasto di biahe di parlamento manera voorzitter a pidi nos" Wever a sigura NoticiaCla.com. Pa loke ta su ausencia durante reunion di Citgo, NoticiaCla.com a compronde cu esaki tabata pa motibo cu e tabata den exterior pa motibo medico di su famia. Algo cu despues Wever a reacciona ariba tambe. "Mi ta lamenta cu e parlamentarionan di AVP a bay Parlatino sabiendo e urgencia cu nan mes a pone pa trata diferente ley, y asina mes nan a duna prioridad na Parlatino". Ademas Wever a confirma cu su ausencia personal, tabata pasobra e mester a atende cu operacion di su yiu den exterior. 

FRACCION PDR

Lider di fraccion y partido Democracia Real Andin Bikker awe mainta a confirma cu e tampoco a bay Parlatino. "Mi ta na Aruba" Bikker a sigura NoticiaCla.com. Pa loke ta trata e leynan referente reapertura di refineria, Bikker a mustra NoticiaCla.com cu su fraccion a expresa na presidencia di Parlamento di ta keda disponibel den reces si e fecha di 1 di augustus ta uno crucial. Mes momento e ta bisa cu e leynan pa reapertura no ta cla dus no por trata algo cu no a ni yega parlamento. Pa loke ta trata e ley di all inclusive, Bikker a splica cu su fraccion a entrega un peticion pa trat'e e prome siman despues di reces "paso nos no a haya tur informacion rekeri ainda", Bikker a finalisa bisando.