Specialistanan contra plan hospital pa reduci cama y cera un OK

ORANJESTAD - E desicion di hospital Horacio Oduber pa reduci e cantidad di cama durante dos luna (juli y augustus) y cera un sala di operacion, a cay den hopi mal tera cerca e asociacion di specialista (ASHA). Den un carta ,- cu NoticiaCla.com a pone man ariba -, ta mustra cu ASHA tin un problema serio pa cu e desicion aki y cu e por tin consecuencia pa cu operacion di hospital. Como sugerencia di e loke cu hospital kier haci, ASHA a sugeri pa hospital bati alarma cerca AZV y ministerio di salud y pa wak con nan por yuda soluciona e problema. Mientras cu hospital no ta papia di scarsedad di personal, specialistanan ta indica cu esey parse di ta e motibo .

PLANNAN ANUNCIA DI HOSPITAL

E carta di e specialistanan ta dirigi na hunta di directiva di hospital como contesta riba un carta anterior unda cu hospital ta informa nan di e plannan proximo. Entre e medida cu hospital kier tuma, ta papia di un reduccion di uso di cama dependiendo di e specialismo y pa departamento. Ta papia di reduccion di cantidad di 172 cama te na 148 y pa cera un sala di operacion pa un pa dos luna. Problema segun e specialistanan, ta cu no ta duna bisa riba e consecuencianan di e desicionan tuma. Pa loke ta e cierre di e un sala di operacion na juli, directiva no kier duna motivacion pa esaki, y pio mirando cu tin intencion pa mantene e sala aki cera tambe den augustus. 

TILDA SPECIALISTA DI ESCASES DI ENFERMERO

Loke tambe e specialistanan ta keha ariba, ta e hecho cu ta tilda e specialistanan medico di cu no tin suficiente enfermero, cu pa e staf medico ta completamente inaceptabel. Motibonan duna pa e specialistanan no ta hustifica e insinuacionan, e carta ta sigui mustra.  

HOSPITAL NO TA PAPIA CLA

Mientras cu e directiva ta sigura cu e meta di e eliminacion di cantidad di cama no ta pa yuda soluciona e problema cronico di falta di personal, specialistanan ta mustra cu no ta cla kico si, e directiva kier logra cu e medida aki. Despues di analisa e carta completo, e specialistanan ta di opinion cu e desicionan tuma no ta bon defini, esta pa reduci 14% di e camanan den juli y augstus. Como tal e specialistanan ta mustra cu nan no por sostene e desicion di e directiva, y ta yama e desicion uno iresponsabel cu ta crea hopi risico. Como tal a pidi pa no tuma e desicion ainda te ora cu tur otro factornan di risico a wordo discuti y analisa. Ademas ta pidi pa bati alarma cerca ministerio di salud y AZV y wak con ey por yuda soluciona e problema. Nota: e foto di camanan no ta uno di Aruba sino uno generico.