SETAR cu Tech Adventure pa mucha entre 7-12 aña

ORANJESTAD  - Entre dianan 18 pa 22 di juli 2016 SETAR ta organisa un evento nobo specialmente pa muchanan di 7 pa 12 aña cu tin interes den tecnologia, sciencia y innovacion.  Durante tres dia SETAR ta duna muchanan diferente splicacion y muestranan di lo ultimo den tecnologia, manera coding, 3D design, 3D printing, animation, electronics, virtual reality, laser cutting, robotica y mucho mas. Na final di cada sesion e muchanan lo tin oportunidad pa experimenta cu locual nan a siña. E ta un siman di aventura tecnologico.  Durante e di cuater dia, e muchanan lo por traha riba nan mesun projecto. E ultimo dia, diabierna dia 22 di juli 2016, SETAR Tech Adventure lo tin su tremendo Expo cu lo tuma lugar na SETAR Store. Riba e dia aki e muchanan lo expone locual nan a traha durante siman. Esaki ta habri pa publico y tur por bin pa mustra nan sosten y interes pa e trabao di e muchanan. Tambe, lo tin varios gadgets y experimentonan interesante pa adulto y mucha por experiencia, manera Virtual Reality, robotica cu lego, hologram traha cu celular y mucho mas. Entrada na Expo ta completamente gratis.

GRUPO 

E grupo ta parti den dos. Muchanan entre 7 cu 9 aña lo atende SETAR Tech Adventure tur dia entre 9 or di mainta pa 1or di merdia y muchanan entre 10 cu 12 aña lo atende di 2 or pa 6 or di atardi. Lo tin guia pa supervisa y yuda e muchanan durante e oranan menciona. Pa participa mester bay na website www.setar.aw of www.setar.tech pa mas informacion of pa registracion. Pa registra e participante mester entrega un video cortico riba e website mes na unda cu e mucha ta splica dicon e lo kier participa den SETAR Tech Adventure.  E deadline pa registra ta dialuna dia 11 di juli, 2016. Participacion ta gratis y ta inclui algun snacks chikito y bebida. Cuponan pa SETAR Tech Adventure ta limita, pues acudi di biaha pa haya mas informacion y participa.