Trahadonan a pone beslag riba Marriott hotel na Corsou

WILLEMSTAD - Un grupo di 59 trahado a pone beslag riba Marriott hotel na Corsou e siman aki. Abogado Olga Kostrzewski a confirma esaki na NoticiaCla.com. Motibo di e beslaglegging ta claridad riba nan posicion huridico. Algo cu nunca no a sosode. Mientrastanto a haya confirmacion cu e hotel a wordo bendi y cu tin tur indicacion cu e trahadonan no lo haya nan placa cu nan tin derecho ariba. Como tal a pone beslag riba e edificio y terenonan di e compania (Rif Resort Hotel NV). 

BESLAG

For di november 2015 e trahadonan a haci un peticion riba nan posicion huridico. E claridad aki nunca no a bin. Si a haya confirmacion cu propiedad di e hotel lo a wordo bendi a termino corto y cu e trahadonan lo a wordo ofreci un areglo di pago. Esaki pasobra tabata conoci cu den un benta, e personal lo no a wordo tuma pa e doñonan nobo di e hotel. 

BENTA A TUMA LUGAR CABA

A resulta, segun e abogado y su socio Achim Henriquez a sigui splica, cu e hotel ya lo a wordo bendi caba na Orco Groep y cu lo entrega di e propiedad por tuma lugar un ora pa otro. Ademas a intercepta emails cu a bay pa e huespednan di e hotel, cu ta yegando, cu a wordo avisa pa busca acomodacion otro caminda debi na e cierre di e hotel. Esaki ta tambe en bista di remodelacion di e hotel cu e cumprado kier haci na e edificionan. 

COMPANIA BASHI

Ta cla cu e compania riba e manera aki lo ta bashi y cu lo laga un compania bashi atras como consecuencia cu e trahadonan lo por lubida nan placa (di p.e. cesantia). Pa evita esaki, a pone beslag riba e edificionnan di e hotel, pa asina e trahadonan por tin un tipo di siguransa riba pago. E trahadonan no ta descarta otro medidanan hudicial den direccion di e hotel, su doñonan, comisario y otro interesadonan. Te ey e splicacion di e abogadonan di e trahadonan a confirma na NoticiaCla.com. Foto cortesia https://vimeo.com/150351888