Ruiz: Famia kier pa husticia prevalece pa Mitch Henriquez

ORANJESTAD - Famia di defunto Mitch Henriquez kier pa husticia prevalece pa nan defunto. Diaranson atardi miembronan di fraccion di MEP a compania e famia di Mitch Henriquez na Santana y Misa di Noord pa recorda un aña di Mitch su fayecimento tragico na Hulanda a consecuencia di forsa policial cu nos tur por tabata testigo di dje den e filmacion cu a circula riba internet. Un caso tristo cu merece di mas atencion di nos parti. 

PREGUNTA NA MINISTER NA HULANDA

Riba e mesun dia aki, Parlamento di Aruba a manda un lista di pregunta na Minister di seguridad y husticia na Hulanda. E pregunta mas importante ta si Mitch su famia y pueblo di Aruba lo por conta ariba cu lo tin husticia den e caso penoso aki. Ya un aña a pasa, rapportnan a wordo traha y ta yega ora pa husticia por prevalece. 

ARUBA DEN SHOCK

Na parecer di e fraccion geel, na Aruba ainda nos ta den shock y no a realisa kico a pasa cu un Arubiano na Hulanda. Na Aruba nos no a marcha manera na Hulanda si a wordo haci. A scoge pa reza y pidi Dios cu por tin husticia den e caso aki. Pero nos mester puntra nos mes si esaki ta suficiente y si nos no mester vocifera nos mes mas fuerte pa e inhusticia haci cu un yui di tera.

FORZA NA FAMIA Y AMISTAD

"Nos ta manda nos palabra di forsa pa tur famia y amistad di Mitch Henriquez y na e Pueblo di Aruba e refleccion si ta asina aki nos mester laga tur cos den man di Dios of si nos tin cu mustra nos desacuerdo tambe cu te ainda husticia no a yega den e caso lamentabel aki. Nos ta spera cu husticia lo prevalece pa Mitch Henriquez" Xiomara Ruiz Maduro na nomber di e fraccion a bisa.